هل تعلم أن الأرقام العربية هندية وأن الارقام الانجليزية عربية !!

من الحاجات اللي بنكبر وإحنا فاهمينها غلط بسبب نظامنا التعليمي القَمعي الجميل هيا إن الأرقام (١،٢،٣) دي أرقام عربية، وإن (1،2،3) أرقام إنجليزية .. وهيا غير كده خالص .. آه والله 😀 

الأرقام الأولي (هندية)، والتانية (عربية) ..  إحنا كـ (عرب) بنتعامل في حياتنا اليومية بأرقام (هندية) من غير ما ناخد بالنا .. نظامنا التعليمي .. تعاملاتنا التجارية .. كللل حياتنا مبنية علي الأرقام دي .. وهيا في الآخر (مش عربية)!  إزاي؟! 

بص يا سيدي.. الأول بس عاوزك تفهم الفرق بين (العدد) و (الرقم) :

الرقم عبارة عن (شَكل) أو (رَمز) بيتكب بيه (العدد)، و (الرقم) اللي بيعبر عن (العدد) مبيكونش حاجة خارجة عن الأرقام : (0،1،2،3،4،5،6،7،8،9). 

بمعني.. إن دلوقتي لو هكتب لك إن معايا (خمسة جنية) مثلاً.. فـ (الخمسة) هنا عبارة عن (عدد) الفلوس اللي معايا، وعلشان أعبر عنها هختار (رقم) من الأرقام اللي فوق دي اللي هوا : (5) .. فهكتب لك كدا مثلاً : “أنا مش خارج النهاردة أحسن مش معايا غير ((5)) جنية في جيبي!” 😀

وفي حالة لو عاوز أكتب لك إني غيّرت شاشة الموبايل بـ (مائتان وخمسون جنيها) يبقي هختار (رقم) أعبر بيه عن (عدد) الفلوس اللي صرفتها فـ هكتب لك: “أسكت! مش أنا غيّرت شاشة موبايلي المكسورة بـ ((250)) جنية أول إمبارح !”..

وصلت لك كده؟! كده عرفت إن (الرقم) ده حاجة للتعبير عن (عدد) الحاجة اللي معايا/أو صرفتها/أو محتاجها أو أياً كان! 
وعرفت إن (العدد) ده مش هعرف أعبر عنه بـ (رقم) خارج عن الأرقام دي: (0،1،2،3،4،5،6،7،8،9).

طيب.. جميل خالص 😀
بس برضو لسّه مُصر علي إن الأرقام دي: (١،٢،٣) هندي مش عربي، وإن الأرقام دي: (1،2،3) مش أنجليزي لكنها عربي 😀 

إزاي؟؟!! تعالي أقول لكـ …..

خليني أحكي لك حكاية بسيطة خالص .. بين الهند والمسلمين من كام سنة فاتوا ..

زمان كان العرب بيستخدموا حاجة أسمها (حساب الجُمَل) علشان يعبروا عن (الأرقام) .. فـ كانوا بيعملوا جدول ويحطوا فيه كلمات وقدام كل حرف قيمة عددية تعبر عنه..

مثلاً كلمة (أبجد) الـ (أ) كانت واخدة قيمة (1)، والـ (ب) كانت قيمتها العددية (2)، وال (د) كانت (4)… إلخ.. زي الصورة اللي قدامك دي

فضل العرب ماشيين بالنظام ده لغاية ما في سنة 771م جِه وَفد لخليفة في (العصر العباسي) أسمه (أبو جعفر المنصور) وكان معاهم كتاب ألّفُه واحد هندي أسمُه: (براهما جوبتا)، كان بيتكلم عن الرياضيات والأرقام وعلم الفلك والنجوم والكواكب.

ولأن الخليفة ده كان مهتم بالفلك فـ أمر إن الكتاب يتترجم للعربية ويألفوا كتاب يتكلم بأستفاضة أكبر عن الكواكب وغيره.. وبالفعل عالم أسمه (محمد بن إبراهيم الفزاري) ألف كتاب سمّاه (السند هند)، وبالفعل فضلوا شغالين بمحتوي الكتاب ده، وفي نَفس الوَقت كان الأوربيين شغالين بترقيم روماني مفيهوش الـ صفر (0).

جِه بعد العالِم ده عالِم من أفضل العقليات علي الإطلاق.. الخوارزمي.. أسمه بالكامل: (أبو عبدالله محمد بن موسي الخوارزمي) .. كان غير معروف بالمرّة، وظهر أسمه لأول مرة في السجلات التاريخية كـ مُعَلِم في مكان في بغداد أسمه (دار الحكمة) ودي كانت تعتبر أكبر مؤسسة تعليمية في التاريخ الإسلامي لبغداد.. كانت عبارة عن مُلتقي لأعظم حضارات العالم القديم كله من بينها: الحضارة البابلية، اليونانية، الهندية، العربية والفارسية. 

كان واحدة من أعظم الحاجات اللي عملها في حياته إنه كان بيدرس النصوص الهندية القديمة؛ درسها لفترة طويلة من شبابُه. 

وبعد ما وصل لسِن 25 سنة نشر كتاب عن الحِساب بالأرقام الهندية وأتكلم فيه عن كل اللي أتعلمُه عن الرياضيات الهندية علي مدار الـ25 سنة دول. الكتاب أو النظام اللي نشرُه ده كانت الأرقام فيه بتبدأ من الصفر (0) ودا معناه: (لا شيء) لغاية الـ9. 

أطلق علي النظام ده أسم: (الخوارزمي عن الأرقام الهندية) أو (Algoritmi de numero indorum) باللاتينية. 

الكتاب ده مكانش مشهور ساعة ما أتنشر، لكن بعد حوالي 300 سنة من نشر الكتاب الكتاب دا بقي من الكتُب الأكثر تأثيراً علي مدار التاريخ؛ ودا لأن واحد أسمه (ليونارد فيبوناكي) لقي نسخة منه فترجمُه للاتينية، ومن ساعتها بدأ الأوربيين يتعاملوا بنظام الخوارزمي؛ لأنه كان أسهل بكتير من النظام الرومان اللي قولنا عليه فوق .. وأتعرفت الأرقام دي بـ (الأرقام العربية) وبدأ علماء كتير ينصحوا بأستخدامها وعلي رأسهم عالم إيطالي أسمه (فيبوناتشي)، ودا ألف كتاب كامل هوا التاني عن الأرقام العربية دي سنة 1202.

وفي نفس الوقت فـ المسلمين أشتغلوا بالنظام ده لأنه كان أفضل من حِساب الجُمّل والجداول و (أبجد) و (هوز) وكل الجُمَل اللي جديرة بأنها تكون أسماء آلهة إغريقية دي 😂 

المهم.. الهنود كان عندهم أشكال كتير من الأرقام، فـ العلماء المسلمين أختاروا مجموعة منها وأعادوا تشكيلها (عملوا لها Retouch يعني 😀 ) وبقي عندهم نظام رقمي يعِدوا بيه ويحسبوا.

العرب كان عندهم سلسلتين من الأرقام دي: (الأرقام الشرقية)، و (الأرقام الغُبارِية). 

الأرقام الشرقية اللي هيا: (١،٢،٣ لغاية الـ٩) ودي طوروها من كذا تصميم هندي.

الأرقام الغُبارِية اللي هيا: (1،2،3) ودي كان أسمها (غُبارِية) لأنها كانت بتتكتب الأول بالصُباع أو البوص علي لوح متغطي بطبقة تُراب خفيفة.

الخوارزمي كان صمم النوع الأخير من الأرقام –اللي هيا (1،2،3)- علي أساس عدد الزوايا اللي في كل رقم.. بمعني إن رقم (1) فيه زاوية حادة فوق –هتلاقي صورة في التعليقات بُص عليها!- والرقم (2) مثلاً ليه زاويتين والـ (3) ليها 3 زوايا… لغاية الـ (9).. ولأن الصفر (0) علي شكل دائرة ومكانش فيه أي زوايا فبقي (صفر)؛ لأنه بيحتوي علي = صفر زاوية.. آه والله! 😀 

فـ من ساعتها وعلي مستوي العالم بقوا يستخدموا (الأرقام العربية) اللي هيا هندية و (مش عربية) 😀 واللي طورها عالِم عربي وهوا أساساً (مش عربي).. لكنه مولود في (أزبكستان) 😂 

بعد كدا كل ما تبُص لأي رقم علي شاشة موبايلك.. الكمبيوتر أو حتي علي وَرَقَة ويكون (٧) أو حتي (7) هتبقي عارف القصة من أولها للآخر:D

وكله بسبب الخوارزمي.. واحد من أعظم العقليات العربية اللي أثرت في العالم كله.

متنساش تعمل شير للبوست وتدوس لايك 👍 ؛ علشان المرّة الجاية نحكي لك البيضة جَت الأول ولا الفرخة.. الشمس ولا القمر.. الصيف ولا الشتاء.. التيشيرت ولا السويت شيرت