السفر والهجرة (سؤال وجواب)

بما إن الوضع في مصر وبعض الدول العربية صعب على “بعض الناس” ، وكتير بيفكر في السفر ، وبما اني مسافر من ٢٠٠٩ منهم ١١ سنة مهندس في السعودية و ٦ سنين في اكتر من شغل في امريكا .. اخرهم مدير مشاريع ، فقد رأى بعض الحبايب في الفترة الأخيرة انهم يسألوني عن السفر .

حبيت أجمع كل الأسئلة وأجاوب عليها هنا لتعميم الاستفادة.

بسم الله:

هل السفر أحسن ولا أكافح في بلدي؟

قولا واحدا .. لمعظم الناس “السفر أحسن”. لكن لو عندك بيزنس شغال حلو في بلدك حتى لو كانت (بنجلاديش) احسن من وظيفة مرموقة في بلد مش بلدك حتى ولو كانت (أمريكا).

ايه هي اسهل واقصر طرق السفر؟

التقديم على فيزا الزيارة او السياحة لأي بلد هي أسهل طريق ، سواء امريكا او السعودية او اي دولة ، وانت ونصيبك فيه ناس بتتقبل وفيه ناس لأ ، بالضبط زي ما بتقدم على وظيفة ، كلها رزق ومكتوب.

مين يقدر يساعد في التقديم؟

انت تقدر تقدم لنفسك لو فتحت فيديوهات لطريقة التقديم في اليوتيوب ، ولو مابتعرفش يبقى تروح لمكتب سفريات يقدم لك بطريقة احترافية.

ايه هي الطرق التانية؟

حسب الافضل فالاقل والاصعب فالاسهل .. (التعارف والزواج من أهل البلد – الهجرة للأقارب من الدرجة الأولى – برامج الهجرة والعمالة الماهرة لكل بلد – اللجوء الانساني – اللجوء السياسي – تأشيرات العمل والكفالة – الدراسة – الزيارة للعمل – الزيارة للمؤتمرات – الزيارة للاقارب – السياحة).

اعمل ايه عشان اسافر أسرع؟

مفيش طريقة سحرية .. وهي رزق من الله .. لكن انك تكون مؤهل أكتر فرصك بتبقى اكتر .. اللي معاه شهادة اكاديمية او احترافية عالية ومعاه شهادة لغة (توفل او ايلتس) بدرجة محترمة وعنده سجل خبرات محترم ، ده مؤهل عن غيره انه يسافر وكمان يستقر بعد توفيق ربنا.

ممكن شرح مختصر لكل طريقة سفر؟

صلوا على النبي:

١. التعارف والزواج:

طبعا السوشيال ميديا تقدر تربط ناس ببعضها من اخر العالم لاخر العالم ، لي اصدقاء كتير اتعرفوا على بنات محترمات في كلا من (السعودية- فنلندا- أمريكا- الارجنتين – ايطاليا) وربنا كرمهم واتجوزوا وسافروا لهم، خلي بس نيتك خالصة لله انها جوازه العمر مش لعبة والا هتتكعبل جامد.

 ٢. الهجرة للاقارب:

طبعا افضل حاجة القريب من الدرجة الاولى اب .. ام .. ابن .. ابنه ، والاقارب للي معاهم الجنسية بتوصل ل ١٥ سنة عما تيجي . اما الدعوة للزيارة فسهلة لكبار السن صعبة للاعمار الصغيرة ،لان طبعا دول مش جايين يزوروا ويمشوا ، فهيبقى الصغير مقبول غالبا لو كان مرافق لشخص عاجز عن الحركة.

٣. برامج الهجرة والعمالة الماهرة:

معظم البلاد فيها شكل من اشكال التأشيرات للهجرة سواء كانت عشوائية او للعمالة الماهرة من اول العلماء واساتذة الجامعات لحد العامل الزراعي المحترف، شرط انك تلاقي حد عايزك هناك ، ودي لازم حد يخدمك فيها لو مجالك مطلوب.

٤. اللجوء الانساني:

اخوانا في اماكن النزاعات زي سوريا واماكن في العراق والسودان وفلسطين والصومال مؤهلين اكتر من غيرهم للتقديم عبر برامج الامم المتحدة للجوء الانساني وهم بيبعتولهم وبيسافرو الدول اللي عالقايمة .. بس الموضوع بياخد وقت.

٥- اللجوء السياسي:

ده للمطاردين “في او من” بلادهم يقدروا يخبطوا على باب اي دولة ويطلبوا لجوء سياسي بس الشرط انك تدخل الدولة دي او تكون على بابها “باي طريقة كانت”، لكن اعرف انك طلعت من بلدك وقفلت الباب وراك .. مفيش رجوع الا بعد الجنسية ويحيينا ويحييك ربنا.

٦- تأشيرات العمل:

عقود العمل بتكون عن طريق “كفيل” بالسعودي او “سبونسر” بالأمريكي ، وده راجل او مؤسسة عندها شغل وبتقدملك على تأشيرة عمل، الاجراءات بتختلف حسب كل دولة وفيه نظام قرعة للموضوع ده في كذا بلد ، لكن الاهم ان الراجل التقيل ده لو عايزك بيجيبك مهما تعددت العوائق، بيلاقي طريقة يعني.

٧- الدراسة:

عن طريق التقديم في مؤسسة تعليمية في البلد اللي انت عايز تروحها وهم بيخلصولك الورق مع وزارة الهجرة، ولو دافع ثمن اول سنة دراسية جامعية مثلا عادة بتقبل من غير عوائق، لكن الفيزة دي بتحط قدامك شوية عوائق في الشغل، لانك جاي تدرس مش جاي تشتغل، فممكن تقول انك هتتمرمط شوية حلوين عما تنقل لفيزة العمل.

٨- الزيارة للعمل:

فيه خطابات بتطلع من مؤسسات كبيرة بتطلب استدعاء خبراء في مجالات مختلفة، لو انت خبير وتعرف حد ، بيبعتلك تزور المؤسسة وعادة القبول بيبقى بنسبة كبيرة ، لكن مش مضمون ١٠٠٪؜ ، اما توصل البلد فيه مسار او الية للتحويل للعمل او الدراسة حسب الفرص المتاحة.

٩- الزيارة للمؤتمرات:

هي الحقيقة كانت لحضور ندوات بحثية او فاعليات عالمية، لكن للاسف بقت سوق لناس معينة بيطلعك للمؤتمر او مرافق لعاجز في المؤتمر وبياخدوا فلوس كتير وبتروح تكسر الفيزا عادة- انا معرفش حد بيعملها بس فيه ناس جت عليها ومبيقولوش، لكن الفيزا نفسها بتبقى سياحة وممكن تتحول هناك لدراسة او ماشابه.

١٠- الزيارة للأقارب:

هي تأشيرة سياحة عادية زي امريكا او في السعودية اسمها زيارة عائلية او شخصية بتقدم انت عليها وقريبك بيحاول يدعمك بمستندات داعمة انك هتيجي تسكن عنده ويتكفل بيك، لكن نسبة الرفض فيها للسما لو كان حد في سن العمل.

١١- السياحة:

هي اشهر فيزا في كل البلاد والقبول فيها ياناصيب ، رجال اعمال واترفضوا وناس بلا دخل ثابت واتقبلوا، لكن معايير القبول المعلنة هي انك تثبت للسفير ان في حاجة بتربطك ببلدك ولازم ترجع لها ، زي بيزنس كبير او وظيفة مرموقة وحساب جاري تقيل، لكن عادة الكل بيقدم.

الخاتمة:

السفر نفسه مش حل لأي مشكلة، وناس كتير جت ومستحملتش ومشيت سواء في السعودية او امريكا. السفر اوله صعب دايما مهما كانت حالة الهجرة اللي انت جاي عليها، فلازم شوية مرمطة لان البلد مش ماشية زي ما بلدك ماشية، التأقلم مع الناس سواء في لغتهم وثقافتهم بياخد وقت، وان يبقى لك سعر وسطهم بياخد وقت اطول.

لو ممعكش لغة وشهادة قابلة للتحويل انصحك بلاش دولة اجنبية ، لأنك هتكون ملطشة وكل يوم بمصيبة متعرفش جت لك ازاي. للأسف العرب عموما والمصريين خصوصا وضعهم مش احسن حاجة في البلاد الاجنبية ، وان اوهموك بالعكس، معظم الناس الموجودة ماطورتش في نفسها وشغالين شغلانات سيئة وفلوسها قليلة واتعودوا عالمساعدات اللي هي اساسا بتعيشهم عالكفاف.

اذا كنت من الناس اللي ممكن تشتغل ١٢ ساعة وبعدها ترجع تاخد دش وتاخد قهوة تقيلة وتبتدي تذاكر حتى ولو لغة البلد اللي انت فيها ، وتنام ٤ او ٥ ساعات ؛ فأقولك اهلا بيك ده مكانك وقيمتك هنا مش في بلدك للأسف، اما اذا كنت حاطط في بالك السفر نفسه هو طوق النجاة ، فهتكون حياتك مابين شغل الشارع وبيت ما يتدخلش، واما تنزل بلدك هتحس انك رايح جنة الفردوس

وربنا يوفق الجميع