داعش .. كيف نشأت الأسطورة الوهمية … وكيف ستنتهي

اللي ساب ودانه للإعلام يعرفه على داعش يركز في اللي جاي عشان هيبقى متأخر حبتين تلاتة .

بعد ما أمريكا نطرت صدام من العراق حطت على كل اللي تبعه .. زي المسلمين السنة ( نص الشعب ) وبدلتهم بالشيعة والأكراد في الحكم .. وفشكلة حزب البعث الحاكم وده كله قيادات عليا للجيش العراقي .. وحلت الجيش نفسه اللي كان من أقوى الجيوش العربية ويقال كان أقوى جيش ساعتها .

هنا القاعدة بقيادة ( أسامة بن لادن ) قال لكل دول تعالوا على حجري .. فبعت لهم أول واحد اسمه ( ابو مصعب الزرقاوي ) ايوووه .. هو ده اللي كان بيقطع رؤوس الأمريكان والشيعة وأي حد ساعد الجيش الأمريكي لغزو العراق ، وابتدى الراجل ينسق مع العشاير ( جمع عشيرة = قبيلة ) عشان يساعدوه في محاربة الأمريكان وكون جماعة كبيرة من القتلة وسماهم ( قاعدة الجهاد في بلاد الرافدين ) ، بس الراجل ده من كتر الفظائع اللي عملها انفضت الناس من حواليه وأمريكا اصطادته سهل واتكل على الله .

استلم بعده واحد تاني كان ضابط في الجيش العراقي واسمه ( أبو عمر البغدادي ) .. ولم الناس حواليه أكتر من تاني وابتدى ينفذ عمليات عسكرية تتعب الامريكان وحلفائهم بجد وبرضه أمريكا إصطادته بعد فترة بالطيران هو والنائب بتاعه .

هنا ظهر ( أبو بكر البغدادي ) الحاكم الحالي لداعش وده للي ما يعرفوش واخد دكتوراه في علوم القرآن والفقه من بغداد ، وواخد تدريب عسكري واستراتيجي على أعلى مستوى قدرت توصله القاعدة أو جيش صدام نفسه ، وأمريكا كمان عملت معاه الواجب وسجنته سنتين في سجن اسمه ( بوكا ) في العراق ، وده بقى اللي كان أوباما عامله عشان يبيض وشه من اللي حصل في سجن ( أبو غريب ) تحت ادارة بوش ،

يعني أحسن أكل وأحسن شرب والناس متفاته بالمتسابه ، ده يصاحب ده وده يحب في ده ، فالبغدادي كون علاقات مع كبار قادة المعارضة للوجود الامريكي في العراق زي كبار افراد جيش وشرطة ، ورجال أعمال ، وجهاديين وابرزهم العقيد ( حجي بكر ) واضع الخطط الاستراتيجية لداعش ، العلاقات دي تخليه اما يطلع يبقى رئيس بلد بحالها ، وقد كان !

طلع ابو بكر البغدادي من السجن وجمع كل دولم وقالهم إردموا يارجالة عاللي فات وبصوا شوفوا انا هاعمل ايه ، لقاءات حلوة مع قادة العشائر السنية في العراق ، تجميع لأهم قادة حزب البعث من كبار العسكريين في جيش صدام ، اتصالات حلوة بالقاعدة للدعم ، ويالله يارجالة نفوت في الحديد .

كان شغل الراجل على الأرض أقرب لشغل دولة بتحتل دول تانية ، يدخل المدينة من هنا ويدي مراكز القيادة والحماية من المنئي خيار لحد ما تعلن استسلامها رسمي ويبقى البغدادي الحاكم الفعلي لها وماتسألوش عن السلاح لانه كان أرخص من الاكل ساعتها ، محافظة ورا التانية في العراق .. وبعض العشائر بتهلل له .. والناس كانت بتستقبله استقبال الفاتحيين عشان يخلصوا من الفساد الاداري للحكومة العراقية الموجودة .

الراجل لقى صيته سمع وبقى معاه مدن ومحافظات بمواردها وبنوكها وناسها ذات نفسهم ، راح قال خلاص نخليها دولة بجد ونسميها ( دولة العراق الاسلامية ) ، ده كله والحكومة العراقية الموجودة عمالة تعيط لأمريكا انها تنقذها .. زي العادة يعني ، بس ( اوباما ) عمل ودن من طين وودن من عجين عشان كان خايف يكرر اللي عمله ( بوش ) .. وكان أوباما للأمانة مستهتر بقوة داعش والبغدادي .

البغدادي جاله واحد حبيبه اسمه ( أبو محمد الجولاني ) فقاله خد ياض يابو محمد إيه رأيك تروح تعمل اللي انا عملته هنا في العراق بس في سوريا ؟ .. قاله ده انت تأمر ياسيد الموعلمين ، وراح البغدادي باعت معاه ييجي 6000 مقاتل على اعلى تدريب بأسلحتهم وراح عمل في سورية جماعة سماها ( جبهة النصرة ) …

كانت سوريا ساعتها مش معروف مين بيضرب في مين وكترت الحركات اللي بتضرب في النظام وعلى راسهم الجيش الحر ، فبشار لقى في جبهة النصرة دي الخلاص له عشان دول يحاربوا دول ويتفرغ هو للفرجة وبس ، فأمر حرس الحدود وقيادات الوحدات انهم يسيبوهم ويغطوهم كمان بالطيران من الجماعات التانية .. وبالفعل بقى دول يضربوا في دول ويعيني ( الجيش الحر ) اللي كان فاضل له تكه ويمسك سوريا على المستوى الدولي ضعف خالص قدام تمدد جبهة النصرة والحركات الجهادية وحزب الله .

شوية والبغدادي قال للجولاني كفاية عليك كده يابرنس الليالي وتعالى بقى نضم المحافظات العراقية اللي مسكتها أنا .. على المحافظات السورية اللي مسكتها انت ويبقى زيتنا في دقيقنا وأنا اللي أحكم ، فالراجل ما عجبوش الكلام وراح عيط ل ( أيمن الظواهري ) زعيم القاعدة ، راح عمنا الظواهري فاقع خطاب مرئي للبغدادي واللي معاه .. انه عيب كده وكل واحد يلعب في حتته ، فالبغدادي قالوا لا لا لا دنا اشتريك ياعمنا وقام عامل بيان طويل عريض بوجوب قتال اي حد ما يبقاش تحت رايته ، وقام مسمي تنظيمه ( دولة الإسلام في العراق والشام ) والحروف الاولى من الاسم = داعش ، ولو ان لو حد نطق كلمة ( داعش ) دي قدام تنظيم داعش في الاماكن اللي مسيطر عليها يعاقب بالجلد عشان مابيحبوهاش !!!

فتح البغدادي عالبحري واستهدف كل مراكز القيادة السورية واللي ييجي في طريقه من جبهة النصرة بتوع الجولاني أو الجيش الحر أو البشمركة الاكراد وقدر في لمح البصر انه يهيمن على مساحة أرض من العراق وسوريا أكبر من المساحة الاجمالية لأي واحدة فيهم وشال الحدود مابينهم ، ومن هنا راح مسمي تنظيمه ( دولة الإسلام ) وبس ، وأعلن أنه هو خليفة المسلمين في نص 2014 وان اي حد عايز ينضم لدولة الاسلام يشرف ، واللي عايز يجرب يقرب .

الراجل لقى معاه موارد وفلوس تسد عين الشمس من آبار البترول اللي استولى عليها ( طلب مهندسين بترول يشتغلوا على فكرة وجاله ناس من اوربا ) ، والبنوك اللي في المدن اللي خدها ، وتهجير اي مخالف له في العقيدة من مسيحيين وايزيديين وغيرهم من بيوتهم وشركاتهم ومحلاتهم ، وكمان خطف الشخصيات الهامة والمساومة عليهم ، وفيه بعض الابحاث اللي بتقول مخدرات واتجار في البشر بس محدش عرف يثبت .

لم يهتم حد بالدعايا والميديا والاعلام قد ما الراجل ده واللي معاه اهتموا ، فأي عمل سواء إجرامي ضد أعدائهم أو خيري مع مؤيديهم وتوزيع زيت وسكر، كان بيتعمل ولا زال بيتعمل عليه أفلام هوليودية ينبهر بيها أي حد بيفهم ميديا .. فبالكم بقى اللي مابيفهمش ، وده بالرغم من الغلق المستمر لمواقعهم وحساباتهم عالنت بس ما بيهمدوش ، واستعان الراجل بعناصر على أعلى مستوى من التدريب في كل المجلات ، يعني الرجل المناسب في المكان المناسب ، فهتلاقي مثلا ان المحافظات والمدن اللي استولى عليها التنظيم .. القيادات بتاعتها هم قادة سابقين في الجيش العراقي من اول رتبة عميد لتحت ، آه ما هو اصل اللواءات عدمتهم أمريكا بعد صدام ، انتوا مش فاكرين ولا ايه ؟

وهتلاقي اللي بيشتغل في ركن المال من كبار الماليين في حكومة صدام ، واللي بيشتغل في الميديا معظمهم اجانب كانوا شغالين اصلا في شركات عالمية ، واللي جمع كل دول فكرة إعادة الخلافة الاسلامية .. وما يمنعش برضه من شوية فكة وحبة فخفخة ورحرحة ، والتنظيم ماحرمهمش للأمانة بيدفع بسخاء لم يدفعه أي جيش نظامي عربي بما فيهم الجيش القطري أعلى رواتب الجيوش العربية .

طيب الدنيا تسكت على كده لااااأ إزاي ؟ .. غالب الحركات الجهادية في مختلف الدول العربية والاجنبية بايعت البغدادي كخليفة وداعش كدولة للإسلام ، وعلى سبيل الحصر لا المثال ( أنصار بيت المقدس بمصر – أنصار الشريعة في ليبيا – قاعدة اليمن – جماعة الشباب في الصومال – بوكوحرام في نيجيريا والدول المجاورة – التوحيد والجهاد في غرب افريقيا – شوية من قاعدة افغانستان بدون بتوع الظواهري – حركة ابو سياف بالفلبين ) .

وبحساب مساحات الاراضي اللي مسيطرة عليها فعليا الجماعات دي تلاقيها قد مساحة مصر والسودان مع بعض بلا مبالغة ، وكل دول بيروحوا وييجوا على مقر داعش في العراق وسوريا من الحدود اللي محدش عارف يحكمها .

العالم ابتدى يفوق لخطر داعش متأخر أوووي لأن الكل قال كلهم ارهابيين ويكش يولعوا في بعض بجاز ، بس للاسف داعش اخلفت ظنون وتكهنات الكل وتفوقت حركيا وتكتيكيا على الحركات الارهابية كلها بما فيهم تنظيم القاعدة الأم نفسه .. وبقى تعدادهم في بعض المراجع يقارب الـ200.000 مقاتل ( الاحصاء الكردي ) ، غير الاطفال اللي داعش بتربيهم لكم عشان المستقبل الجميل المشرق .

أمريكا بعد ما مصالحها اتضررت أوي هي وحلفائها من داعش أعلنت الحرب عليها وبقالهم سنة عمالين يضربوها بالطيارات .. وروسيا كمان دخلت بعد ما بشار قرب ينتهي ده غير فرنسا دلوقتي ، لكن داعش للاسف شغالة على وينجين ، وينج دولة نظامية لها جيش للحماية ومؤسسات نظامية للحكم والقضاء والمال والتعليم ، ووينج تاني بتتصرف فيه كعصابة وده لما بتنضرب بالطيارت لأن اللي دارس علوم عسكرية يعرف ان حرب العصابات يفوز من عالارض .. والطيران مالوش لازمة الا في منع التوسع وبس .

شوية معلومات صغيرة :

• داعش ومن يندرج تحت لوائها متكفرين من كل علماء الدين الإسلامي والمسيحي واليهودي .
• داعش قتلت عائلات وقبائل وشردت أسر عددهم – حسب بعض الاحصائيات – قريب من اللي شردهم بشار في سوريا .. وأمريكا في أفغانستان .
• داعش لا تعرف معنى المواطنة وحقوق الانسان فالهدف الوحيد هو رضا الحاكم المتفرد اللي مابيغلطش واللي بيأيدوه وبس .
• داعش بتتبنى ثقافة التتار في الترويع وده ظاهر من طرق قتلهم .. وبتتبنى ثقافة اسرائيل في فرض القوة .. وده كله عشان تكسب مكاسب أكثر بدون مقاومة .
• داعش بتحارب دلوقتي كل دولم ( القوات الأمريكية وحلفائها اللي ما يتعدوش – جيش النظام السوري – الجيش الحر – جبهة النصرة – البشمركة الاكراد – الجيش العراقي – الجيش الايراني – الجيش المصري ( بطريقة اضرب واجري ) – الجيش السعودي ( بطريقة فجر وموت ) .. ورغم ده كله عاملين زي الحيل تعالجه من هنا يطلعلك من الناحية التانية .
• اللي فاكر داعش شوية مرتزقة يتعلقوا من رجليهم – كلام المصريين الطيبين – يبقى واهم ، فغالب المقاتلين في داعش مدربين كتدريب قوات المارينز الامريكية وقوات البلاك ووتر وممكن البعض يفوقوهم ( عشان كده بريا متفوقين ، وما بيموتوش الا بضرب الطيران ) ، واللي مش مصدق يقرا كلام المحللين العسكريين في أي عملية قامت بيها داعش زي الهجوم على صحيفة شارل ايبدو و هجمات باريس الأخيرة.
• كل الأبحاث والصحف اللي قريتها محايدة وبمراجع وشهادات مؤكدة – ووالله عدت الـ 300 صفحة – ومعظمهم أقروا بأن محاربة داعش مش هتيجي بالجيوش بس الا بالعمل على تفكك داعش من الداخل وان المؤيدين لها يلاقوا بديل تاني يلتفوا حواليه لأن داعش إن لم تتوقف ستتمدد وده غايتهم .