كوريا الجنوبية اساسا بلد قفر غفر بلا موارد وبلا ثروات طبيعية زيها زي اختها اليابان .. وللاسف الثروات الحلوة الطعمة مش موجودة الا في كوريا الشمالية بتاعة الواد اللي كلنا عارفينه .. لان كوريا الجنوبية 70 % منها اراضي جبلية صخرية .
بعد احتلال من اليابان دام أكثر من 36 سنة .. وبالذات في الحرب العالمية التانية اتقسمت الكوريتين واحدة بقت في عب الاتحاد السوفييتي وهي ( كوريا الشمالية ) .. وواحدة بقت على حجر أمريكا وهي ( كوريا الجنوبية ) .. واما اعلنوا القطبين الاعداء الانسحاب من الاختين العدوتين بعد الحرب .. فقالولهم عيشوا حياتكم مع بعض حرب بالوكالة .. الكوريتين قعدوا يطسوا في بعض من سنة 1950 لسنة 1953 .. وكانت معظم الأضرار على ( كوريا الجنوبية ) الصراحة .
الاضرار تكلفتها فاقت الـ 69 مليار دولار .. يعني ما يعادل خمس مرات الناتج الاجمالي لكوريا الجنوبية وقتها .. ضيفوا على كده تدمير كامل غاباتها و 25 % من بنيتها التحتية و 40 % من وحداتها السكنية و 46.9 % من شبكة السكك الحديدية .. و 500 كيلوا متر من الطرق والقناطر و 80 % من محطات توليد الكهرباء و 68 % من مجموع المصانع .. بالاضافة لمليون و 300 الف خسائر بشرية .. متوسط دخل الفرد وصل 79 دولار .. وفي سنة 1960 تم تصنيف كوريا الجنوبية في قايمة أفقر دول العالم وحطوها في ترتيب تحت دولة ( غانا ) المحروسة … طبعا اللي يسمع عن كوريا كده مايشوفهاش دلوقتي !
المهم .. ربنا رزقهم براجل بركة في سنة 1971 اسمه ( بارك جونغ هي ) وأسس حملة جهنمية اسمها حملة ( المجتمع الجديد ) بثلاثة مبادئ هى : ” الاجتهاد ، الإعتماد الذاتي ، التعاون “.. واسلوبها هو ((( الثقة المفرطة للشعب في حكومته المخلصة ))) .. وادواتها القاسية .. ان الشعب كله يشتغل بلا ادنى بطالة .. لكن يستحمل يشتغل برواتب ضعيفة بهدف زيادة الإنتاج الكلي للدولة .. ودعم مؤسساتها الوطنية واللي بتعود بفايدة عالدولة ككل ومش بشكل مباشر عالمواطن الغلبان المفحوت .. طب ازاي ؟؟
كله هيشتغل بجد واجتهاد براتب قليل وساعات عمل اكتر .. في سبيل بناء الوطن اللي بيشوف المواطن بعنيه التطور الملحوظ اللي هيفيده ويفيد عياله مستقبلا .. طب ايه التطور الملحوظ ده ؟؟
المرحلة الاولى هي التعليم تطبيقا لحكمة ( كونفوشيوس ) : ” الملك والمعلم والوالدان متساوون ” .. فالاستثمار اصبح بكثافة في التعليم وبالذات مدارس التدريب المهني .. بهدف تطوير الإنتاجية وتحسين مهارات المورد البشري الكوري .. وقد كان .. بدأوا في الاول بنسبة صغيرة من الميزانية الكلية للدولة في التعليم وهي 2.5 % ووصلوا في الثمانينات لـ 23 % .. والطلبة الفنيين وصلوا لـ 70 % من مجموع الطلبة في كوريا بالكامل .. في سنة 1980 اشتغلوا بعثات تعليمية وارسلوا عدد كبير لامريكا واوربا .. وكانت البعثات دي الصراحة متقدمة اساسا كمساعدات من ماما امريكا .. لضمان ولائهم للحلف الأمريكي عن الحلف الروسي .. بلغت قيمة المساعدات الاجمالية 12.6 مليار دولار من الخمسينات لأواخر السبعينات .
المرحلة التانية هي زيادة الدخل بزيادة الإنتاج وتصديره .. وده زي الانتاج الزراعي والصناعات الصغيرة زي المنسوجات والاخشاب والجلود .. وحاولت الحكومة تضييق الفجوة بين القرى والمدن ويقللوا جدا الفروقات في الرواتب بين الاتنين .
المرحلة الثالثة بدأت في الثمانينات وبيسموها ( المرحلة الإكمالية لأسس الرفاهية ) .. وده بعد ما أطلقوا العنان للقطاع الخاص انه يرحرح وياخد راحته في تطوير البلد سواء بنية تحتية او خدمات او زراعة او صناعة .. ومن أهم الشركات دي .. العظيمة ( سامسونج ) .. يعني الحكومة تصرف والشركات الكورية كبيرها وصغيرها يشتغلوا .. فصرفت الحكومة 7.2 تريليون وون كوري عالتطوير بمعدل 517 مليار وون سنويا .. وده تم بالنسب الجاية دي .. 57 % من جيب الحكومة رأسا .. 32 % تبرع من الشركات ورجال الأعمال والهيئات الشعبية .. 11 % ضرائب .. استثمروها كلها في البنية التحتية والتعليم وتطوير البلد ككل .
الكلام ده جاب فرص عمل جديدة مكانتش موجودة في كوريا قبل كده .. فالدخل ارتفع والكل اترزق .. وغالب الناس استريحت .. فدخلوا بقى على الابداع زي ما بتعمل أي دولة متقدمة .. ايه مراحله ؟؟
الجودة ثم الجودة فالجودة .. تحفيز كبير للتصنيع الكوري المبني أساسا على الجيل الجديد اللي تم تأهيله وتعليمه .. معلومة محدش هايصدقها بس ابحثوا عنها تلاقوها .. عدد خريجين كليات الهندسة بتخصصاتها في كوريا الجنوبية بالثمانينات فاق عدد الخريجين في ( بريطانيا وألمانيا والسويد ) مجتمعين !!!
المنتج الكوري بقى بينافس نظيره في كل الدول من اواخر الثمانينات واوائل التسعينات .. وللامانة فسخ كل المنتجات في وقتنا الحالي .. اللعب في الثمانينات بقى على كبير .. شدوا استثمارات مع اليابان وأمريكا منهم واليهم .. استيراد وتصدير .. بلغت معدل خيالي في اواخر الثمانينات لدرجة ان التقارير الاقتصادية الامريكية بتقول ان السوق عندها استقبل 41.7 % من مجموع الصادرات الكورية .. فحصل عندهم حاجة جديدة اسمها الاقتصادي ( معدل التوفير المرتفع ) يعني فلوس زايدة عن حاجة الدولة ممكن تعمل بيها أي شيء .. طب عملوا حاجة .. اه عملوا .
دخلت في حاجة اسمها ( التنمية الشاملة ) .. ده مفهوم لو عرفناه في بلادنا نبقى عُمد .. وده يعني كل حاجة شغالة في مستوى معين يرتفع مستواه .. يعني مثلا بنصنع سجاد طب ليه ما نصنعش سفن وسيارات والكترونيات .. ومن بعدها الصناعات العسكرية وصناعات النانو شديدة التطور .. ولو تحبوا نقارن كوريا بمصر دلوقتي مثلا .. نلاقي ان حسب البنك الدولي في 2015 متوسط دخل الفرد الكوري 36.5 ألف دولار .. أما في مصر 3700 دولار .. يعني نصيب الفرد في كوريا قدنا عشر مرات .
حاليا اختلفت شكل كوريا الجنوبية جذريا .. ولو تشوفوا صورها بعد الحرب في الخمسينات وصورها دلوقتي هتخبطوا ايد على ايد .. بلاش ..اتفرجوا على شكل خريطة كوريا الشمالية والعتمة فيها وشكل عواميد النور الملعلطة عالخريطة في كوريا الجنوبية وليلها اللي بقى زي نهارها .. بلاااااش .. شوفوا شكل البني ادمين الكوريين ساعتها وشكلهم دلوقتي .. بقوا انضف من اليابانيين واجمل من الروس .. وكلنا متابعين مسلسلاتهم وحافظينهم .. عقبالنا يارب .
طب دلوقتي ممكن يحصل اللي حصل في كوريا عندنا .. طبعا اه .. وليه لأ .. وحل اللغز في (( ثقة الشعب في حكومته )) وانها بتشتغل له هو بس .. مش لاي مصلحة تانية او اشخاص بعينهم
