كيلوجز اسم عالمي مشهور ومصدعنا ليل ونهار عالتلفزيون، بس من المفارقات ان القصة ده بدأت بعركة بين اخوات وصلت للقضاء و فضلت في المحاكم اكتر من 10 سنين.
قد يهمك: طرق فعالة لإتمام البيعة بنجاح
بداية الكورن فليكس
بدأت القصة لما وليم كيلوجز راح يشتغل محاسب في المصحة اللي كان مشرف عليها اخوه الكبير جون 1876 جون كان دكتور مشهور وليه اختراعات كتيرة في مجال التغذية زي زبدة الفول السوداني وكان وليم الصغير جنب شغل الحاسابات بيساعد اخوه في تطوير الاكل.
في يوم من الايام جون نسا عجينة مخلوطة بالتوت طول الليل تاني يوم الصبح بدل ما يرميها دخلها المعجنة فطلعتله رقائق ، فخبزها وقدمها لنزلاء المصحة فعجبتهم جدا و طاروا بيها. وكانوا لما بيروحوا بيوتهم بعد العلاج بيبعتوا يطلبوا منها تاني بالمئات فكان الاخوات بيبعتوهالهم بالبريد.
جون الدكتور كان علي الله حكايته ( زي كل الدكاترة) بيعمل الرقائق قدام كل الناس، ورافض يعمل الموضوع بطريقه تجارية هو شايف انها حاجة صحية وخدمة للنزلاء وخلاص.
وليم المحاسب كان هيتجنن، كان شايف ان ده سر واختراع مش مفروض اي حد يعرفه و المفروض انهم يعملوا شركة يبيعوها للناس في المحلات، لكن اخوه الكبير كان رافض لحد ما واحد من النزلاء السابقين عمل الرقائق كمشروع تجاري وبدء يبيع وينجح.
طبعا وليم كان حيتشل تحت ضغط وليم عملوا شركة وابتدوا يطوروا التصنيع من القمح للذرة للرز وكانت مبيعاتهم عالية. سنة 1906 حصل خلاف بين وليم و جون لان جون الدكتور كان رافض اضافة السكر للكورن فليكس فانفصلوا.
وليم بعد ما عمل شركة جديدة بسنة ربنا وفقه و الشركة ولعت والنار ما سيبتش فيها حاجة فبناها من تاني وحقق نجاح كبير لدرجة انه بعدها بسنتين كان بيبيع في اليوم 120 الف عبوة و سمي الشركة ( Kellogg Toasted Corn Flake Company)
قد يهمك: مشوار نجاح ويب سيت طلبات
اشتباكات وثروة طائلة
لكن مع نجاحه اخوه الكبير جون بسبب الغيره دخل في قضايا معاه علي الاسم وانتهت المحكمة بعد عشر سنين بالحكم لصالح وليم ان من حقه استخدام الاسم. الشركة في فترات لاحقة توسعت بشكل مهول لان حوالي ربع الامريكان بياكلوا الكورن فليكس بتاعها علي الفطار.
وليم مات سنة 1951 بعد سنين مليانه نجاحات واعمال خيريه في نفس الوقت، كيلوجز دلوقتي منتجاتها موجودة فى اكتر من ١٨٠ دولة حول العالم و مبيعاتها 13 مليار دولار سنويا.
في 2015 كيلوجز عملت اتفاقية مع شركة توليرام الي كانت بتقدم نودلز في افريقيا ووصلوا مصر سنة 2018 باستثمارات 2.7 مليار جنية.
فلما تشوف الاعلانات الكتير ما تستغربش لان هدفهم خلال خمس سنين يزودوا حجم مبيعاتهم من 50 مليون دولار ل500
قد يهمك: حكاية كيلوجز نودلز الجزء الاول
