نصائح ذهبية لحل المشكلات الزوجية

في حياتكو المشتركة ما تتعاملوش مع بعض على انكو مع الظروف على بعض، ما تفشّوش غلّكو في بعض، العكس، اتعاملوا انكو واحد قصاد الظروف..

المفهوم ده شكله بسيط، صح؟

بس للأسف عدم فهمه وعدم الصبر على تنفيذه بيطهّأ الواحد في عيشته وبيكرّهه في نفسه، في حين فهمه صح وتنفيذه بيوصلوه لحالة الرضا وبيشحنوا الواحد يوميا عشان يقدر يكمل..

ازاي تبقوا صف واحد ضد الظروف؟

لما هي بتطلب منك فلوس بتكون محتاجة الفلوس دي للبيت، مش قاصدة تضايقك وتقرفك، مش قاصدة تزود همومك وتبقى هي والظروف عليك.

اتكلم معاها بالعقل، وجمّل الكلام بالعاطفة، اطلب منها تفكر معاك ممكن الحاجة تتعمل ازاي أو ايه البديل.. المشاركة لها مفعول السحر..

لما هو بيقول لك أجيب لكو منين مش بيكون قصده يبقى هو والظروف عليكي، بيكون ما عندوش فعلا ومش عايز يحس بقلة الحيلة فبيرد رد سخيف.

ابلعي الرد وادعي له ربنا يوسع رزقه هيفك وهتتكلموا وتتناقشوا، وهيكون ليكي دور في التفكير معاه..

قد يهمك: نصائح حياتيّة مجرّبة للابتعاد عن المشاكل الزوجية

المصارحة المستمرة مهمة، وخاصة في الأمور المادية..

يعني لو انت مش قادر تفهم الفلوس بتروح فين لأنك بعيد عن الأسعار والشرا ممكن تطلب منها (بطريقة ودية مش تحدي) تساعدك بأنها تسجل الطلبات لمدة أسبوع أو شهر عشان انت تفهم الموضوع ماشي ازاي..

ولو هي ما تعرفش مرتبك كام وبالتالي مش مقتنعة ان الدخل محدود عرّفها (بشرط ما يكونش ده هيسبب لك مشكلة –

زي انك مش عايز تعرّفها انك بتساعد أهلك مثلا)، لما الست بتتأكد من الدخل بتزيد طاقتها وبتعمل اللي عليها عن اقتناع وبتحس ان انتو الاتنين في صف واحد فعلا..

ما تدقش على كل كبيرة وصغيرة.. ما تدقيش على كل كبيرة وصغيرة..

الضغوط بتخلينا “لازم” نغلط، وده معناه اننا “لازم” نوسع صدرنا وطاقة احتمالنا لشركاء حياتنا.

“لازم” نتغاضى ونطنش ونتغافل ونعدي ونفوّت بالذات لما تكون الأمور تافهة، ده نمط حياة مطلوب جدا جدا جدا..

التقدير..

وده أشكاله وأحواله كتير، أبسطها كلمة حلوة، هدية بسيطة، شكر قدام حد، المهم كل طرف يبقى “باستمرار” عارف ان الطرف التاني حاسس بيه ومقدر اللي بيعمله عشانه..

العاطفة..

وجود العاطفة وخلاص غير كافي، لأن التعبير عن العاطفة مهم جدا، وده موضوع لوحده وناس كتير كتبوا فيه،

بس يهمني فيه باختصار: دايما طمّن زوجتك انك بتحبها وانها مرغوبة، ودايما حسسي زوجك انك بتحبيه وانه مرغوب.

ربنا يعمر بيوتنا ويبارك لنا ويفرجها علينا جميعا

قد يهمك: أربع نصائح حقيقية لرشاقة الدائمة !!