كتير مننا نفسه يفتح مشروع وينجح وناس كتير بتسافر تحوش قرشين عشان تحاول تعمل مشروع في بلدها وفي مننا اللي بيشتغل اكتر من نص سنين عمره عشان يعمل مشروع بيحلم بيه طول حياته..
طب يا ترى من المفروض ترمي فلوسك في مشروع و تسيبها على الله زي مابيتقال ولّا تاخد بأسباب فشل اي مشروع قريب من فكرة مشروعك وتتجنبها؟!!
في بوست النهارده هنحاول نجمع الاخطاء الشائعة لفشل الشركات الناشئة أو اسباب فشل الشركات الناشئة وطبعاً لو فضلنا نكتب كتير الاسباب عمرها ماهتخلص عشان بتختلف الاسباب من شركة لشركة ومن شخص لشخص ومن حالة لحالة بس النهاردة هتعرف معانا ايه هي اهم الاسباب المشتركة بين معظم الشركات للفشل..
1- تشبع السوق بالمنتجات المتكررة وابتعاد اصحاب رؤوس المال عن الافكار المبتكرة أو الافكار اللي بيكون عليها طلب من المستهلكين
2- حاول تعمل مشروع يكون عندك خبرة كبيرة فيه لان ضعف الخبرة أو عدمها من اهم اسباب فشل اي مشروع
3- غرور مؤسس الشركة والتفاؤل زيادة عن اللزوم لفكرتة دون عمل حساب المخاطر اللي ممكن تواجه الشركة في مرحلة النمو
4- عدم وجود رأس مال كافي لمرحلة البداية لان وجود المال من البداية بيكون مهم لأي شركة في هذة المرحلة بالأخص
5- قد يكون زيادة رأس المال عن اللازم مشكلة لصاحب الشركة لان بعض الناس بيهتموا بديكور المكان والفرش الفاخر للشركة اكتر مابيهتم مثلا بعمل دراسة جدوى اللي بتبين هتصرف فلوسك في ايه بالظبط
6- سوء اختيار الشريك من اهم اسباب فشل الشركات لان بعض الشركاء بيسيب كل حمل وضغط العمل على الشريك الاخر والبعض قد يكون لا يمتلك نفس شغف الشريك الاخر وقد يكون الشريك مش بيحب اسلوب المناقشة في القرارات والنقطة دي بتكون من اهم اسباب فشل بعض الشركات
7- عدم عمل دراسة جدوى للمشروع وإهمال الاستشارات القانونية اللي بتبين كل الالتزامات القانونية اللي على شركتك من ضرائب أو غيرها وكمان بتبين اهمية السجل التجاري والبطاقة الضريبية
8- من اهم اسباب الشركات الناشئة عدم إختيار مديرين مميزين ذو كفائة وخبرة لإتمام الاعمال مع عدم إختيار فريق عمل مناسب لإنجاز المهام فلذلك على اي شركة ناشئة اختيار فريق عمل محترم يمتلك الكثير من الخبرات لتخطي اي شروف صعبة والنهوض بالشركة
9- حاول دايماً تاخد بالك ان جودة منتجك بتعبر عن اسم شركتك دائما لان الجودة شىء اساسي العميل ميقدرش يستغنى عنه ولازم تعرف ان العميل بياخد باله من جودة كل منتج وبيقارن بينها وبين اي منتج في السوق.. فحاول دايماً انك تهتم بجودة منتجك وتعمل على تحسينها عشان الاقبال يكون كبير عليه
10- حاجة تانية بتيجي بعد الجودة وهي سعر المنتج بتاعك مقارنةً بالمنتجات الاخرى اللي في السوق.. مش من الطبيعي يكون سعرك اغلى من المنافسين في السوق لان دايماً العميل بيدور على اقل سعر واعلى جودة فمن الافضل ان يكون سعر منتج ارخص نسبياً من المنافسين وده مهم في بدايتك
11- عملية البيع متوقفة بدرجة كبيرة جداً على عنصر مهم جداً وهو “التسويق”.. التسويق المظبوط أو دراسة السوق بيوضحولك من البداية طلبات ورغبة العملاء مع تحديد شريحة واضحة لإستهداف العميل وتحديد المنتج اللي محتاجة السوق أو الطلب عليه بيكون كبير
12- دراسة المنافسين ليك من البداية من اهم عوامل النجاح وحاول تكون ذكي في اختيار المنافس وابتعد عن الشركات العملاقة اللي عندها القدرات الكبيرة انها تخرجك من السوق تماماً وحاول تعمل محيط ازرق لمنتجك وتعمل ميزة تنافسية خاصة بيك لوحدك لتتفوق على منافسيك
13- عدم وجود خدمة ما بعد البيع وعدم الاهتمام بالعميل ورأيه من الاسباب اللي تخلي العميل يدور على بديل ليك لان هذه الخدمة بتعبر عن قوة البراند أو المنتج.. فحاول دايماً انك تهتم برأي عميلك وخدمة ما بعد البيع لعمل الثقة عند العميل
في النهاية حاول دايماً تهتم بكل سبب سمعتة أو قريته ممكن يكون سبب فشل لأي شركة كانت موجودة وفشلت والاسباب اللي كتبناها دي ممكن تكون بعض اسباب فشل الشركات وممكن تشاركوا معانا من خلال التعليقات تكتبوا لينا ايه هي بقيت الاسباب من وجهة نظركوا اللي أدت لإنهيار شركات كتير
