إيه الموضوع ؟ الموضوع وما فيه ان أثيوبيا من زمااان عايزة تبني سد عندها وماقدرتش تبنيه إلا قريب .. والسد ده ممكن يعرض مصر لخطر قلة حصتها في مية النيل وقلة الكهربا اللي بتتولد في السد العالي .. دي خلاصة الموضوع .. نجيب بقى الحكاية من أولها عشان اللي مش عارف القصة :
نهر النيل ده له مسارين واحد اسمه النيل الابيض وده بييجي من منطقة البحيرات العظمى وسط افريقيا في أوغندا وتنزانيا … وده مصر ماتستفادش منه كتير عشان طول ماهو ماشي بيتاخد منه وبيتبخر كمان ، وفيه مسار تاني اسمه النيل الازرق وده بييجي من أثيوبيا وده نسبة استفادة مصر منه قرب الـ 86 % من حصتها في نهر النيل … والنيل الابيض والازرق بيصبوا في فرع واحد بداية من الخرطوم في السودان لحد مصر ويرجع يتفرع تاني في دمياط ورشيد .. تمام كده ؟
مصر من ايام الاحتلال البريطاني سنة 1902 كانت عاملة اتفاقية بتقول ان محدش يعمل اي مشروعات في افريقيا على نهر النيل عشان حصة مصر ماتتضررش – غصب واقتدار واللي عايز يجرب يقرب 
– بعد كده قلت حدة الموضوع شوية في اتفاقيات تانية سنة 1906و 1929 ودي بتحدد نسبة مصر في نهر النيل بـ 92.3 % وان لا مساس عليها ، وكمان الاتفاقية الاخيرة دي ادت مصر حق الفيتو في رفض اقامة اي مشروع على روافد النيل كلها .
اثيوبيا برغم نهر النيل عندها بس ساعات بيجيلها جفاف ومجاعات – آخر مجاعة ميت فيها مليون بني آدم – لأن معندهمش تخزين لمية النيل زي مابيحصل في بحيرة ناصر في مصر ، والدنيا ما بتمطرش طول السنة عندهم يعني ، فجم سنة 1956 وجت لهم فكرة بناء سد على النيل الازرق اللي عندهم يخزنوا بيه مية ويولدوا بيه كهربا واستعانوا بالخارجية الأمريكية فيه رأسا .. وفي سنة 1964 أمريكا حددت لهم أنسب مكان للسد .
فيه مفاوضات عملتها اكتر من دولة من دول حوض النيل منها مبادرة في سنة 1999 عشان يبنوا مشاريع عالنيل ، ومصر رفضت رفضا قاطعا والكل رضي ومحدش قدر يفتح بؤه ساعتها ، لأن مصر عندها حق الفيتو وكانت هي أكبر وأقوى دولة مكانة في دول حوض النيل ومحدش قدر يدوس لها على طرف .
اثيوبيا عملت وشغالة حاليا في سدود على قد حالتها وصلوا لـ 11 سد كلهم ماقدروش يوفروا كهربا لـ 9 % من المواطنين في اثيوبيا ، فالسد ده بقى فاتحة الخير عليهم والشعب معظمه ورا الحكومة في الموضوع ده باللذات ، عشان هايكفوا نفسهم منه كهربا .. وهيبيعوا منه للدول المجاورة كمان وممكن مصر تبقى على قائمة المشتريين ( اقتراح جدي من الحكومة الإثيوبية على فكرة ) .
قعدت أثيوبيا نايمة عالموضوع في ظل الصراعات القبلية اللي عندها – عندها ناس بتتكلم اكتر من 100 لغة ولهجة – واخرهم حكومة شيوعية كانت قاعدة بتهوي ولا بتعمل حاجة .. فيه كلام اتقال انهم كانوا عايزين يبنوه ايام عبد الناصر والسادات لكن هددوهم بضرب السد لكن مفيش وثائق للموضوع ده .. المهم انهم جم فاقوا في سنة 2009 وعملوا مسح جغرافي لمكان السد المقترح في الستينات ، وعملوا التصميمات اللازمة لإنشائه .
في 2010 عملت اثيوبيا كذا اتفاق افريقي بغياب مصر والسودان ، وبعدها على طول الحكومة المصرية عملت اتفاق مع السودان – مش مع اثيوبيا – للحفاظ على حصتهم في السد ( معرفتش ازاي الصراحة ) وقبلها اصلا في 2008 مبارك طلع وقال ( هدمر لهم السد لو اتبنى) .. وكان زعلان اصلا منهم من ساعة محاولة الاغتيال في أديس أبابا سنة 1995، وفي اواخر 2010 مصر قدمت شكوى رسمية للأمم المتحدة لمنع تمويل السد ، والزام اثيوبيا بالتعاون .
اثيوبيا في 2011 قدمت عقد بـ 4.8 مليار دولار للشركة الايطالية الضخمة ( ساليني ) ، والتمويل قالوا من الحكومة وجيوب المواطنين والتبرعات – لكن في صوابع بتلعب في الموضوع وفي اتهامات كتير لكذا دولة على راسها اسرائيل حبيبة اثيوبيا من ايام فحت البحر – وفي ابريل 2011 اعلنت اثيوبيا رسميا انها هتبني السد ، وعشان الكسوف ادوا نسخة من مخططاته لمصر ساعتها .. بس الدنيا كانت مقلوبة في ثورة 25 يناير 2011 ومحدش فضي للموضوع عععظن .
في اواخر 2011 اقترحت اثيوبيا عالسودان الشراكة في ملكية السد ، والموضوع ده مش معروف له وصل فين – لكن مع مواقف السودان الاخيرة ووقوفها مع اثيوبيا .. فشكلها منصصه فيه – جه بعد كده مرسي وراح زار السد كمهندس اكتر منه رئيس دولة وشاف المخططات والدنيا .. بس ما اتفقوش على حاجة .. وبعدها راح قعد مع عمر البشير رئيس السودان واكدوا التعاون في الموضوع ده .
في مايو 2013 اعلنت إثيوبيا البدء في بناء السد وحددت انتهائه في 2017 .. عمل بعدها عمنا مرسي اجتماع سري علني 
الحاضرين دعو فيه لضرب السد او دعم مليشيات المعارضة الاثيوبية لضربه .. فبوظ منه الموقف الأثيوبي نوهائي .. والموقف السوداني شبه انهار وطلع البشير قال ده سخف .. برغم ان حكومته على توافق مع الاخوان قلبا وقالبا .. وده لانه خايف من المتمردين السودانيين عالحدود لو دعمتهم اثيوبيا ضد حليف مصر الاول وهو السودان ، وله فيديو قريب مع الابراشي اسمعوه من تحت ، وطلع كمان في بيان رسمي في ديسمبر 2013 وقال ان السد له منافع لمصر والسودان .. دون ذكرها .
في يناير 2014 م بدأت حكومة السيسي في تفاوضات مع الجانب الإثيوبي ، وفي فبراير على طول طلع بيان من وزارة الري بفشل المفاوضات والحمد لله .. طلعت اثوبيا بعد بيانهم ده ببيان وقالت ان طلب الجانب المصري بوقف السد مرفوضون مرفوضون ياولدي ولو لثانية واحدة … واتهمت مصر كمان في كعبلة المفاوضات – ضربني وبكى وسبقني واشتكى – وبعدها وزير الري المصري طلع وقال المفاوضات شغالة ومفيش اي حلول عسكرية ، فراح الراجل الاثيوبي رادد عليه بانتهاء 32 % من اعمال السد وانهم قادرين على حمايته عسكريا ، والامم المتحدة قالت في بيان رسمي ان مصر لم تطلب تدويل قضية السد ، يعني ضمان حماية حصتها على مستوى النظام الدولي للأمم المتحدة .
في ابريل 2014 روسيا والصين والاتحاد الأوروبي وإيطاليا وصندوق النقد الدولي اعلنوا وقف تمويل السد ، والمشروع برضه ما وقفش ( طب مين بيمووول ؟؟؟) .. في يونيو 2014 السيسي راح قابل رئيس الوزراء الاثيوبي عشان يحل معاه المشكلة .. بس ما اتحلتش .. كلام من هنا وكلام من هنا على بناء السد وتوقيفه .. لكن الرد الاثيوبي دايما كان اقوى لان تهديداتهم دايما عسكرية سواءا رئيس الوزراء ولا وزير الدفاع .
جابو بعد كده مكاتب تحكيم تشوف تأثير السد على حصة مصر والسودان واحد فرنسي وواحد هولندي ، فيه مصالح فرنسية كبيرة مع اثيوبيا .. فالمكتب الفرنسي قال كله تمام وعال العال ومصر مش هاتتأثر .. اما المكتب الهولندي قال ان مصر هتعطش وقعد يقول ان ده مبدئيا لان الجانب الاثيوبي مش متعاون معاه في المعلومات اللي عايزها منهم .
في شهر تلاتة اللي فات .. وقع السيسي اتفاقية سد النهضة وهم عشر مبادئ بيقولوا أحقية مصر في نصيبها من المياه والتعهد بعدم الإضرار بيها .. واحسن حاجة فيها المبدأ الاول اللي بيقول ان فيه ( حسن نية ) في الموضوع هههههههه .. آه وربنا .. و الأهرام جريدة الدولة الرسمية مسكت الاتفاقية وشردتها قانونيا .. ولو انها فضلت بنودها سرية شوية بس اعلنوها بعد كده وكل ما مصر من ساعتها تتكلم مع اي مسئول اثيوبي يطلع لسانه ويقول خليكوا في مشاكلكوا الجوانية ومتقدروش تعملوا ايوتها حاجة وانتوا موقعين ع الاتفاقية .. المهم ان ماقالوش في الاتفاقية دي اي جوانب فنية تضمن عدم تضرر مصر .. فنجيب احنا بقى الفنيات دي إيه هي ومخاطرها على مصر :
– الخزان اللي ورا السد ده اول مايشتغل هياخد من 63 : 74 مليار متر مكعب ودي بتعادل حصة مصر والسودان في سنة بحالها .. وده هيظهر تأثيره على مصر وقت تشغيله على طول السنة اللي بعد الجاية .
– قوة السد وامكانية حجزه للمية كبيرة لأنه بارتفاع 170 متر وبعرض 1800 م ، يعني يقفلوا علينا حنفية المية ونعطش 
.. لكن فيه خبراء بتقلل من الامكانية دي لانه اساسا معمول كممر لتوليد الكهرباء مش لحجز المياه .
– بالنسبة للزراعة هتضرر طبعا لانه هيخفض حصة مصر من 10 : 12 مليار متر مكعب .
– اذا حاولت مصر تضرب السد بعد بنائه وتشغيله فمية خزان السد كافية لعمل فيضان في مصر لو السد العالي ما استحملش التدفق السريع اللي جايله ده غير ان هنحارب إثيوبيا بإسرائيل .
– سرعة تدفق المياه فيها اقاويل ان ممكن تقل فالكهربا اللي جاية من السد العالي تقل برضه .
– في تقرير مفتكس – رفقته تحت – بيقولك ان سد النهضة هيعمل مش عارف ايه في القرن الافريقي فبالتالي يهدد تماسك ارضية منطقة الحجاز والكعبة هتقع !!!
– حاليا مكانة مصر وهيمنتها السابقة على المستوى الإقليمي في تراجع شديد جدا – من تصريحات الافارقة عامة والاثيوبيين خاصة – وده يطمع اي حد انه يبني اي حاجة ع النيل بعد اثيوبيا .
