من الأسئلة اللى بتراود أي حد عنده طابعة و كمبيوتر … هو أنا مش ممكن أطبع فلوس و أشهيص نفسى بدل ما أنا مستنى الكام ملطوش بتوع المرتب كل شهر؟!
و الدليل على إن الفكرة دى منتشرة و بتدور فى دماغ ناس كتير جدًا إننا بنسمع كل فترة عن القبض على عصابة متخصصة فى تزوير الفلوس… تفتكر ليه الناس دول بيتمسكوا؟
خلينا متفقين إن طباعة الفلوس أو الشهادات المعتمدة أو الأوراق الرسمية تعتبر كلها أعمال غير قانونية، و مجرد محاولة طباعة حاجة من الحاجات دى ممكن يعرضك للمساءلة القانونية و السجن و الحاجات الجميلة اللى إحنا عارفينها دى
خلينا نشوف الفلوس و الأوراق دى فيها إيه انت ماتعرفش تعمله:
أولًا : الهولوجرام (Hologram)
و دا الجزء من العملة اللى بيقلب ألوان باختلاف زاوية سقوط الضوء عليه (سواء الشريط المفضض اللى كان فى العملات القديمة، أو الرقم اللى بيمثل قيمة العملة فى العملات الجديدة، أو الـWater mark اللى بيبقى فى البطاقة أو رخصة السواقة)
الهولوجرام دا علشان تعمله هتحتاج ليزر و أفلام معينة و عدسات بأبعاد بؤرية مختلفة، و ورق من أنواع معينة علشان تعمله، و دا صعب تجيبه طبعًا… إلا لو كان البنك المركزي مأجر مخزن فى بيتكم يطبع فيه الفلوس!
ثانيًا : الحِبر و طريقة الطباعة
معظم جوازات السفر الجديدة و الأوراف الرسمية فى دول كتير بتتطبع بأنواع معينة من الحبر بتكون حساسة لدرجات الحرارة المرتفعة؛ لذلك فى معظم الدول المحترمة (و خلى بالك من “المحترمة” دى لوظابط الجوازات شك إن جواز السفر بتاعك مزور بيعرضه لدرجة حرارة معينة و يشوف إذا كان الحبر اللى على جواز السفر هيتغير لونه ولا لأ
كمان معظم العملات الورقية بتتطبع بنوع من الطباعة اسمه 2.5D Printing، و دا بيخلى الحبر فى أماكن الكتابة بارز شوية عن الورقة (ممكن تعرف الفلوس المزورة لو مشيت إيدك على الكتابة بتاعتها و لقيتها مش بارزة)
بعض العملات زي الـEuro لو اتعرضت للأشعة فوق البنفسجية (Ultraviolet Light) بتلمع بشكل معين لأنها بيستخدم فيها صبغات بتمتص الضوء دا و بتعكسه علشان يكون شكل محدد.
ثالثًا : أنواع الورق :
الورق اللى بتتطبع عليه الفلوس (ورق الـBanknote) مختلف عن الورق العادي بتاع الطباعة كتير؛ ورق البنكنوت بيتصنع من مواد زي القطن و الكتان و البوليستر؛ و دا بيخليه أمتن كتير من الورق العادي بتاع الطباعة (اللب بيتصنع من لُبّ الشجر)؛ لذلك الفلوس ممكن تتغسل و تطلع من جيبك زي الجديدة، لكن ورق الطباعة لأ 
رابعًا : التفاصيل :
مش لازم تكون المشاكل اللى بتمنعك عن تزوير العملة مشاكل تقنية بس؛ الفلوس و الأوراق الرسمية بتتطبع بخطوط و رسومات معينة فيها أخطاء مُصطَنَعة فى رسم الحروف أو فى المسافات بين الحروف أو فى درجات الألوان بتمكن الشخص اللى بيتعامل مع الفلوس كتير (زي موظف البنك مثلًا) إنه يكتشف الفلوس المزورة بمجرد إنه يبص عليها!
خامسًا : عدم توافر الـTemplates :
قد تكون متخيل إن من السهل إنك تستخدم ماكينة تصوير أو Scanner علشان تنسخ ورقة نقدية معاك، لكن عمليًا الموضوع دا مش ممكن!!
معظم العملات النقدية بيكون فيها Pattern معين من نقط صفراء و زرقاء صغيرة جدًا اسمها Eurion Constellation، و دى موجودة على العملات المصرية الحمد لله (لو فى جيبك ورقة بخمسة جنيه طلعها و بُصّ على الوش الإنجايزي فى المربع الأبيض اللى تحت رقم 5 هتلاقيها!!
النُقَط دى وظيفتها إنها تقول لماكينة التصوير أو الـScanner بتاعك إنك بتطبع فلوس؛ و بالتالي أي Scanner جديد بيطلع Error لما بتحاول تسحب الفلوس بيه، كمان برامج التعديل على الصور زي Photoshop بترفض التعامل مع أي عملات نقدية، و معظم الـDrivers بتاعة الطابعات الجديدة بترفض تطبع الفلوس!!
