لما بندخل أي سوبر ماركت بنلاقي منتجات كتير أشكال وألوان، وكمان بنلاقي من نفس المنتج أنواع كتيرة وعلامات تجارية مختلفة، عمرك فكرت إيه اللي بيخليك تمد ايدك وتختار منتج بعينه من على الرف وتسيب الباقي على الرغم إن خبراتنا مع المنتجات دي ممكن تكون الأولى ؟!
لو راجعت نفسك شوية هتلاقي إن فيه بعض الكلمات في الدعاية ممكن تكون خلتك تختار منتج بعينه؛ وده لأن بعض الكلمات بيكون ليها مفعول السحر على العملاء وبمجرد ما بيسمعها العميل بتوجه دماغه نحو شراء المنتج أو الخدمة،
أينعم فيه متغيرات كتير بتأثر على قرار الشراء عند العميل لكن اللي أثبتته دراسات التوثيق إن فيه 10 كلمات بتكون مأثرة أكتر من غيرها في الدعاية وبتخلي العميل ياخد قرار الشراء.
تعالوا نعرف إيه هي الكلمات دي، وازي ممكن نستخدمها في الترويج لمنتجاتنا بشكل بسيط وسهل:
1. مجانًا:
ممكن تشوف إنها كلمة مستهلكة، بس بالرغم من كده الدارسات أثبتت إن الناس بتفضل الكلمة دي مهما كانت مكررة، وبيحبوا أي حاجة تتقدملهم مجاًنًا حتى لو كانت حاجة بسيطة.
وده إللي أكده الخبير التسويقي ” غريجوري سيوتي Gregory Ciotti ” لما جاب منتجين من الشكولاتة الأول ” Lindt chocolate truffles بسعر 0.15$ و Hershey Kiss بسعر 0.01 دولار وعرضهم على عينة من الناس وكانت النتيجة إن 73% منهم فضلوا النوع الأول.
بعد كده عرض نفس المنتجين على مجموعة تانية من الناس بس المرة دي خلي الـ Hershey Kiss مجانًا وخفض سعر Lindt chocolate truffles فكانت النتيجة إن 69% منهم راحو للـ Hershey Kiss وتخلوا عن تفضيلاتهم لأن المنتج مجانًا.
2. حصري:
ودي من الكلمات المميزة اللي أثبتت فاعليتها في التسويق؛ وده لأن الناس بيحبوا يشتروا المنتجات المميزة اللي بتكون متاحة فقط لمجموعة مختارة من الأشخاص، وكملة حصري بتلبي الرغبة دي عندهم. وممكن نستبدل كلمة حصري بكلمات تانية – حسب طبيعة منتجك أو الخدمة اللي بتقدمها زي: للأعضاء فقط، لأصحاب الدعوات فقط …وهكذا.
3. سهل:
عشان حياتنا بقت صعبة ومعقدة نتيجة التقنيات التكنولوجيا، كلمات زي سهل الاستخدام وبسيط أو يسهل القيام به، أو سهل الحصول عليه بقي ليها مفعولها في توجيه قرارات الجمهور نحو شراء المنتج.
وده اللي أثبتته دراسة استقصائية عملها موقع ” entrepreneur ” لما سألوا مجموعه من العملاء عن أسباب تفضيلهم لشراء أحد برامج السوفت وير، وكانت كلمة سهل الاستخدام في المركز الثالث من بين الكلمات اللي دفعتهم لشراء البرنامج.
4. محدود:
ودي من أكتر الكلمات اللي بتحرك العملاء عشان يشتروا المنتج، وبتستخدم في الدعاية بكثرة زي أول 100 شخص هياخدوا قطعة هدية على كل قطعة يشتروها فانت هتتسابق عشان تكون ضمن أول 100 شخص!
وكمان العروض دي بتخليك تاخد قرار الشراء بسرعة؛ لأنه بيكون سباق مع الوقت عشان العرض ميفوتكش حتى لو كان العرض على حاجة مش قيمة!
5. احصل على:
والكملة دي ليها تأثير كبير على قرارات الشراء عند العملاء عشان بتحط القارئ محل مسؤولية، وكمان نفسيًا بتخليه مستعد لاتخاذ قرار الشراء.
عشان كده بنلاقيها بتستخدم بكثرة في الإعلانات زي احصل على خامة أفضل بسعر أقل، احصل على حلاقة أنعم بمجهود أقل …وهكذا
6. أصلي:
مع انتشار المنتجات المقلدة في كل مكان الناس بقوا يدورو على المنتج الأصلي والجودة والأصالة وكمان بيحتاجوا لكلمات مطمئنة عشان يشتروا المنتج، وكملة أصلى من الكمات اللي بتشجع العملاء على الشراء وبتلبي الحاجة دي عندهم. ومن الكمات اللي بتقابلها (غير ملزمة، آمنة، بلا مخاطر، مضمون …إلخ)
7. انت:
كلمة انت أو ضمير المخاطب بتخلي العميل يحس إن المنتج موجه ليه بشكل شخصي عشان كده معظم الإعلانات لما بتيجي تخاطب العميل بتخاطبه بالضمير ده وبالتالي لازم تخلي عباراتك موجه للعملاء مباشرة ومتستخدمش ضمائر الجمع.
8. لأن:
“لأن” متبوعة بأسباب تشرح أهمية الحصول على المنتج بيكون ليها تأثير كبير في لفت انتباه الزبائن؛ وده لأن العقل البشري بيحب يسمع الأسباب والتفسيرات الخاصة بالمزايا اللي بيتمتع بيها منتج عن غيره، وده اللي أكدته أحد الدراسات المذكورة في كتاب “التأثير” لروبرت سيالديني.
9. أفضل:
الناس دايما بتبحث عن الأفضل وممكن تختبر ده شوف كم مرة دخلت فيها على جوجل عشان تبحث عن حاجة واستخدمت كلمة أفضل، عشان كده ودي من الكلمات المهمة اللي بتعكس جودة المنتج وبتشجع العميل على الشراء بس ممكن تيجي بنتايج عكسية لو تم استخدامها مع منتجات رديئة لأنها هتخلي العميل يفقد الثقة في المنتج.
10. مقارنة:
مواقع التواصل الاجتماعي والمواقع والمدونات سهلت على الناس عمل مقارنات بين المنتجات قبل اتخاذ قرار الشراء زي ” المقارنة بين فورد وشيفروليه، بامبرز ضد هوجيز …إلخ،
خد انت زمام المبادرة ووضحلهم بشكل علني في الدعاية الفرق بين منتجك ومنتجات المنافسين ده هيخلوهم ممتنين وهيحسوا بالشفافية وهيشجعهم اكتر على اتخاذ قرار الشراء.
