مبدأياً كده.. الجزأين لازم يتشافوا ورا بعض.. الجزء الأول اسمه “الكنز – الحقيقة والخيال” وده الجزء الثاني.
الحكاية بتقول ان في كنز مدفون في الجنوب يسعى وراه مجموعة من البشر… مين هي الناس دى والكنز عبارة عن ايه ومين الأحق بالكنز؟
هنفهم من أحداث الجزأين مع بعض.
3 قصص من التراث المصري ماشية بالتوازي تقاطعت في اخر نص ساعة في الجزء الثاني علشان توضح الصورة كلها.. تقدر تعتبرهم 3 ضفائر مختلفة نجح شريف عرفة ببراعة انه يعمل منهم ضفيرة كبيرة مترابطة تتقاطع عند الثنائيات المشهورة زى الحب والاختيار.. الدين والسياسة.. السلطة والشعب..
الهدف من الضفيرة الكبيرة انه يقولك ايه هو الكنز ومين صاحبه مع شوية رسائل في النص.
حتشبسوت
.. الملكة القوية بنت الاكابر.. سليلة الاسرة الثامنة عشر.. حفيدة أحمس الأول طارد الهكسوس والوريثة الشرعية للعرش لعدم وجود ذكور.. اتجوزت اخوها غير الشقيق “تحتمس الثاني” وانجبت منه ولد وبنتين.. مات الولد وفضلت البنات..
في نفس الوقت تحتمس الثاني انجب بالفعل تحتمس الثالث من محظيته ايزا..
حتشبسوت قررت تربى كل أبناء جوزها علشان تجهز الملك القادم.. وواضح كده ان تربيتها فلحت لأن تحتمس الثالث كان من أعظم ملوك مصر القديمة عسكريا وسياسيا.. تشهد على كده معركة مجدو واثاره المعمارية وخريطة الإمبراطورية المصرية اللى عاشت من 1425 ق.م الى 1070 ق.م ممتده من نهر الفرات شرقا الى ليبيا غربا وحتى منابع النيل في الجنوب.
صراع محموم على العرش بين كهنة المعبد وبين حتشبسوت.. الدين سلاح الكهنة الأساسي عبر العصور بينما حتشبسوت مفيش في ايديها الا الشرعية ولا يساندها الا سنموت.. مهندس البلاط الملكي..
الكراش بتاعها حسب الرسومات اللى رسمها العمال على جدران معبدها علشان يخلدوا قصة الحب بين الملكة والمهندس.
الملكة محتاره بين الحب والسلطة.. الحب داء يصيب الجميع بلا استئذان ولا يعرف الفوارق الطبقية.. بينما السلطة مرض يسعى اليه الانسان ويصعب التخلص منه.. مرض بيخلى الانسان اشبه بالوحش..
ظهر كده بوضوح في قرار حتشبسوت بحبس حبيبها سنموت لما فضيحتهم بقت بجلاجل.. هند صبري كانت جميلة اوى وهى بتعبر عن الصراع في قلب امرأة شافت حبيبها متهان ومربوط في السلاسل تنفيذا لاوامرها.. بس تعمل ايه.. السلطة كده على رأى الست.
حتشبسوت في الاخر قررت حسم الصراع بالتنازل عن العرش لتحتمس الثالث اللى كبر وبقى راجل يشرح القلب.. قررت تعيش باقى حياتها مع الحبيب.. مش بس كده.. دى كمان قررت انهم يكونوا مع بعض في دار الخلود.. هيندفنوا سوا في نفس المقبرة.. المقبرة اللى ملتها حتشبسوت بتحويشة عمرها..
كنوز الملكة وجواهرها والحكاية كاملة منقوشة على الجدران علشان تفضل قصة الحب عايشة عبر الزمن.
الفيلم بعد شوية عن التاريخ الحقيقي.. (سنموت) هو باني معبد الدير البحري بتاع حتشبسوت واللى اخد بسببه 80 لقب.. المؤرخين بيرجحوا انها كانت علاقة احترام قوية بين الملكة والمهندس حتى انها سمحتله يبنى مقبرته في حرم معبدها..
بس يبدو ان الأمور عند سنموت مكانتش احترام وبس لأنه بنى نفق يوصل بين مقبرته ومقبرتها علشان يكون قريب منها في الحياة الاخرة زى ما كان قريب منها في الدنيا.
عناصر الضفيرة الأولى واضحة في الثنائيات.. الحب والاختيار.. الدين والسياسة.. الشعب والسلطة.
فين الكنز هنا؟؟
لسه شويه..
على الزيبق
.. اشطر الشطار.. حكينا قصته قبل كدا وريث البطل المحبوب حسن راس الغول.. عرف مكان الكنز.. لكن مش من حقه يحصل عليه.. هكذا اخبره حارس الكنز الأسطوري اللى بيظهر كل ما الكنز يتعرض لخطر..
الكنز من حق أصحاب البلد الأصليين لما يتمكنوا من حكم بلادهم.. هو بس مجرد حارس امين على الكنز دورة الأساسي مقاومة الظلم واسقاط الاحتلال والحفاظ على ثروات البلد سليمة لأصحابها الأصليين.
السلطة هنا هي المقدم سنقر الكلبى قاتل حسن راس الغول.. اللى سمع هو كمان عن كنز الجنوب وبيحاول يهزم الزيبق للحصول عليه والهيمنة المطلقة على السلطة المتمثلة في والى عثماني ضعيف ميعرفش اى حاجه عن اى حاجه.. سنقر الكلبى ظالم بيسرق قوت الشعب مستعينا بمشايخ السلطان اللى بيغيروا فتاواهم حسب الطلب وحسب الجالس على الكرسي وحسب المقابل برضه.
على الزيبق يقع في حب الجميلة زينب بنت سنقر اللى وقعت بين ابوها “الماضي” وحبيبها “المستقبل”.. للمرة الثانية في الفيلم.. قصة الحب المستحيل والاختيار الصعب..
بس هنا زينب امورها كانت اسهل من حتشبسوت لأنها قررت تضحى بنفسها وتتلقى سهم الموت الغادر بدل على الزيبق اثناء صراعة الأخير مع سنقر الكلبى ورجالته علشان تموت هي ويعيش على الزيبق.. اللى هو هنا بيمثل الشعب مش نفسه..
الرسالة بتقول ان اى صراع بين الشعب والسلطة.. لازم يعيش الشعب وتموت السلطة زى ما مات سنقر الكلبى بسيف على.
واخد بالك من عناصر الضفيرة الثانية؟؟
هي نفسها ثنائيات الضفيرة الأولى.. الحب والاختيار.. الدين والسياسة.. الشعب والسلطة.
محمد رمضان مش قادر ينسى انه شبح وعربجي.. في لقطة دلع رومانسية زينب بتقوله “اختشى”.. وبدل ما يروح لاطع الكريمة فورا.. قالها “الحب لو في خشا مكانوش عملوا فيه اللى بيتعمل بعد العشا”..
وفى لقطة تانية قالها “الحب لو في ادب مكانوش الحبايب عملوا حاجات قلة ادب”.
العالمين بأمور النساء يعرفوا كويس ان اختشي هنا معناها زود مش معناها عيب خالص.
ثقه في الله زيبق.. 😂😂😂
………………. فين الكنز هنا؟؟
لسه شويه..
بشر باشا
.. رجل البوليس القوي في مصر الملكية.. في سبيل انه يقتل كل نقاط ضعفة قبض على اخوه المدمن المقامر ورماه في السجن.. لكن بشر باشا زيه زى كل البشر .. لما الحب جه كسر رقبته ..
بشر باشا وحش لا يعرف الرحمة اد ايه كان عنيف جدا في صراعه على السلطة في مواجهة الاخوان المسلمين في المعتقل .. بشر باشا قلب بطة بلدى وهو واقف قصاد نعمات.. مطربة الكباريهات المغمورة..
صراع الاختيار الصعب بين الحب والسلطة لما قرر يقطع علاقته بيها بعد كلمتين سخرية من الملك وهو بيكلفه بمهمة القبض على خُط الصعيد.
قصة الخط في الفيلم مختلفة شوية عن الحقيقة.. خط الصعيد كان اسمه محمد منصور .. اتولد في أسيوط سنة 1907 .. نشاطه الاجرامي كان في قمته سنة 47 .. اللى هي سنة وفاته برضه..
انتشرت حكايات اسطورية عن استهتاره بالأمن للدرجة اللى خلته يوقف قطر كامل ويسرق كل ركابة وبعدين يقتل 9 عساكر انجليز في عملية استغرقت ساعات النهار كلها..
وقالوا كمان انه دخل السينما وقعد جمب مأمور مركز أسيوط “عبد الحق بك” وطلب منه كبريت علشان يولع سيجارته وتانى يوم بعتله جواب قاله انا الخط اللى ولع منك السيجارة في السينما.
في عيد ميلاد الملك فاروق ال 27 قابل عزيز باشا اباظة مدير مديرية أسيوط وقاله “قولى يا باشا.. هي الخُط بنقطة فوق الخاء وللا الطاء؟”.. اللى هو بيسمم بدنه يعنى بالإشارة الى فشله في مواجهة المجرم..
عزيز باشا خدها على كرامته وشكل فرقة سماها فرقة الموت بقيادة الملازم محمد سعيد هلال .. وعن طريق بعض تجار الافيون قدروا ينصبوا فخ للخط اللى كان مستخبى في قرية العزبة عند واحد من الاعيان اسمه محروس عازر بك..
الخط كان خاطف ولد صغير اسمه شوقي عوض حنا وطالب قصاده فديه 200 جنية خفضوهم الى 100 جنية بعد وساطة العمدة.. هجوم الشرطة وغياب الافيون وزهق الأهالي من الخط وعمايله ساعدوا في قتله على ايد عمدة البلد حمدي خليفة بـ21 طلقة علشان ترثيه امه الخالة فضة لما عرفت انهم هيشرحوه وقالت “يا ازرق العينين يا أشقر” بعد ما انكرت في البداية انها ابنها..
بيحكى هيكل اللى كان عمره وقتها 19 سنه وحضر الحادث ان جثة محمد منصور ودراعه اليمين “عبد الصالحين” اتحطت على عربية نص نقل مكشوفة طافت البلد مع عربية حراسة تانية فيها الأميرالاي عباس عسكر حكمدار أسيوط وكبار رجال الامن قبل ما يرموه في مقابر الصدقة في بلدة.. درنكة.. واضح ان الخُط علٍم على الشرطة جامد.. وهذا في حد ذاته سبب كافي ان الناس تعتبره بطل.
في الفيلم بشر باشا هو السلطة بشكل عام في مواجهة المجرم.. بدل الأفيون كانت غازية مُلعب زى القمر اسمها لواحظ قدروا عن طريقها يوقعوا الخط.. ولا عجب اطلاقا ان لواحظ نفسها تكون هي الزوجة المستقبلية لبشر باشا بعد انقلاب 52..
بعد ما فقد كل سلطته وراح المجد واصبح نزيل زنزانة حقيرة في سجن القلعة.. هي هي نفس الزنزانة اللى اتحبس فيها الظابط صاحب السلطة الجديد أنور السادات.. مشهد مواجهة بشر باشا السجين مع السادات مشهد جبار وهو بيحذرهم من الوقوع في فخ سحر السلطة وغدرها.
واخد بالك هنا ازاى شريف عرفة بيغزل خيوط الحكاية من التاريخ الحقيقي علشان تتكرر في الضفيرة الثالثة نفس ثنائيات الضفيرة الأولى والثانية؟
الحب والاختيار.. الدين والسياسة.. الشعب والسلطة.
فين الكنز هنا؟؟
جايلك اهو في الكلام..
طيب.. دول ال 3 ضفائر.. كل قصة فيهم ماشيه حلو لوحدها.. ازاى بقى غزلهم شريف عرفه علشان يقولك الكنز اهو وهتعمل بيه ايه؟
احداث الفيلم بتدور سنة 1975.. بشر باشا كان يعرف قصة الكنز الجنوبي.. ميراثه لابنه حسن كان البيت اللى فيه الكنز وخريطة الوصول اليه.. بشر باشا ساب مفاتيح الوصول للكنز لأبنه من غير ما يقوله ايه هو الكنز..
حسن شاب سبعيناتي عايش في الخارج ورجع مصر علشان يبيع ميراثه ويرجع تانى.. ترافقه في رحلة البحث عن الكنز المحامية الجميلة راجية.. بنت اللواء عبد العزيز مساعد ابوه أيام العز.
مين مصر بجنون انه يشترى الميراث؟؟
ولاد العاصي.. دول يبقوا احفاد العاصي الكبير “الخط” اللى بشر باشا كان قتله.. العاصي الكبير وهو بيموت قال ان معاه خريطة الكنز بختم الزيبق.
حسن بدأ يسمع رسالة ابوه ويقرأ في مذكراته.. المشهد الأخير ده هو الزبدة كلها..
بشر باشا من خلال تسجيل فيديو بيقول لأبنه مجموعة جمل برسائل مختلفة..
– “محدش يقدر يحافظ على اللى راح” مع صورة على الزيبق شايل جثة زينب حبيبته..
– “سيرة ابوك.. ولا سيرة الناس اللى فاتوا” مع صورة حتشبسوت بترحل مع سنموت في رحلة الحب والخلود..
الكنز.. ايه هو.. ولمين؟
مع صورة على الزيبق وهو بيجرى بالحصان ناحية الأهرامات بعد ما قتل الكلبى وفى الخلفية حارس الكنز الأسطوري على وشه ابتسامة رضا..
– “هي دى الحكاية يا حسن.. علشان تصدق اللى تشوفه وتكذب اللى مشفتوش.. وتخلى بالك من اللى جاى وتبنيه.. هنا في بلدك”
.. مع صورة تلامس ايادي الاب والأبن عبر الشاشة.. جيل بيسلم جيل يعنى..
شفت بقى الكنز طلع ايه؟؟
الكنز هو الحضارة اللى سابها المصريين القدماء.. التراث.. حكاية ناس كانوا يوما في القمة.. الكنز سابته حتشبسوت وحرسه الزيبق ضد المحتل وورثه العاصي وبشر باشا..
لكنهم لسه مش أصحابه الحقيقيين لأنهم متصارعين.. أصحاب الكنز الحقيقيين هما الاحفاد.. الاحفاد اللى نشأت في ظل حكم أولاد البلد.
الكنز مش فلوس ولا سلطة .. الكنز أهم من الحب اللى مستمر معانا من أيام حتشبسوت لحد النهارده مع اختلاف العصور .. الكنز يستاهل انك تدوس على حبك علشان تحافظ عليه.. الكنز من حق جيل الأحفاد..
اللى هو احنا يعنى.
خدت بالك من اختيار اسم “حسن” للشخصية اللى هتلاقى الكنز؟؟
اللى حرس الكنز زمان كان الشاطر على الزيبق..
واللى هيلاقي الكنز بعد كده لازم يكون هو الشاطر حسن.. بطل شعبي من التراث برضه..
- فهمت شريف عرفه عاوز يقولك انت مين وكنزك عبارة عن ايه بالظبط؟؟
- ممثلين وأداء وتصوير وإنتاج وكل التفاصيل دى مش مهمه.. كلهم حلوين..
- محمد سعد عمل دور عمره وكان مفاجأة المفاجآت بصراحة.. مش هتصدق ان ده محمد سعد بتاع اللمبي وتتح والقرف ده.. دور ممتاز في الكنز مسح تراثه الكارثي فيما سبق.
- التراث المصري هو كنز .. منين ما تمد ايدك هتغرف كنوز .. أتمنى ان اهل السينما ياخدوا بالهم من رسالة شريف عرفه ويرحمونا من حكاوي الجواز والطلاق والخيانة والبوس والاحضان وافلام الشئون المعنوية الهابطة والهبل ده كله.
