قراءة في المسلسل المنتظر “محمد على باشا” ..

نقدر نقسم حياة محمد على باشا الى 3 اقسام..

– ما قبل المجىء الى مصر
– رحلة الصعود الى السلطة
– ما بعد السلطة والتمكين

الـ 3 مراحل مليانين حكاوى وحواديت وانجازات وانتصارات وانكسارات وكل حاجه يحبها اى حد من هواة التاريخ.. وانت بتقرأ عن الراجل ده هتحس انك قصاد 3 شخصيات مختلفه لا يجمع بينهم الا التهور والذكاء الشديد جدا.. بهدله ومرمطة ويتم وجدعنه تلاقى.. شجاعة وقوة وذكاء موجود.. خبث ولؤم الدنيا كله مع حسن التدبير والتصرف المناسب فى الوقت المناسب شغال.. وحشية ودموية وافتراء بزياده موجود برضه.. حصافة وبعد نظر ورؤية ثاقبة هتلاقى.. جنون وخرف ونهاية حزينة برضه شغال.. حياة درامية بكل ما تحملة كلمة دراما من تفاصيل.

لميس جابر كتبت القصة “ويقال سرقتها من استاذ تاريخ فى جامعة بنها” من فترة.. المشروع كله توقف اكتر من مره بسبب تكاليف الانتاج.. من 20 سنة يحيى الفخرانى كان انسب واحد للدور ده.. لكن دلوقتى لا اعتقد.. السن برضه له احكام.

وجود اسم تامر مرسى على بوستر المسلسل يعنى ان الفلوس حاضرة وموجوده.. كله من فلوس الشعب.. بس السؤال هنا هو المسلسل ده هيقول ايه بالظبط؟

تامر مرسى يعنى الشئون المعنوية.. يعنى الشهيد احمد فلوكس والشهيد امير كرارة وكتاب التاريخ بتاع تانية اعدادى وتحيا مصر والكلام ده.. وزى ما عملوا بتوع ممالك النار وقالوا احنا جايبين من 6 كتب “كلها تمثل وجهة نظر واحده” هيعملوا هنا.. اكيد هينقوا من الجبرتى اللى على المزاج.. واكيد طبعا هيبقى الرافعى وعلى مبارك حاضرين بقوه.. واكيد هيختاروا كل ما هو نكد على السلطان فى اسطنبول..

والحقيقة النكد كتير.. بس المشكلة هنا انه فى السكة هينكد على الكفيل برضه.. ودى حاجه يعنى مش مطلوبه بالنسبالهم دلوقتى خالص.. الموضوع هيبقى زى ما تكون عاوز تنكد على مراتك فتروح مطلقها ومتجوز اختها.. يعنى بدل ما كان عندك عدو واحد.. بقوا اتنين.

طيب بعد ما حببوا الناس فى المماليك بعد ممالك النار.. هيقولوا عنهم ايه هنا ايام المذبحة؟؟

اى حد قرأ تاريخ عارف كويس جدا ان مماليك المذبحة كانوا يستاهلوا الحرق “اغلبهم يعنى”.. بس احنا فى مصر مش بنفرق ومش هنعمل حساب ان فى 300 سنة فرق بين عصر الغورى وطومان باى وعصر سليمان بك البواب وعثمان بك البرديسى واحمد بك الكيلارجى.. طالما قلت معارضة.. يبقى انت اخوان علطول وطالما راجل غلط.. يبقى المماليك كلهم مصطفى ابو حجر.

لا استبعد اطلاقا الاستعانة بنشأت الديهى فى السيناريو.. الراجل ده بأمانة هو افجر من كتب عن المذبحة.. قادر يقنعك تماما ان اللى عمله محمد على ده كان بطولي وحلال ومطلوب ومستحب.. ومع شوية تدليس على شوية محلسة هتربط تلقائيا بين مذبحة القلعة وبين مذبحة رابعة.. علشان تخرج بعد المسلسل ده مقتنع تماما ان السيسي هو بانى مصر الحديثة مش محمد على.

عندهم مجال واسع فى التعليم والاقتصاد والجيش.. وفى مجال اوسع برضه فى القهر وكسرة النفس.. عندهم براح كبير فى حروب الشام والاناضول وممكن ييجوا عند اللقطة بتاعة الدرعية ويقولوا مخدناهاش فى الكيلاس.. كل الاحتمالات وارده.. يا ريت بس ينصفوا سير الابطال زى محمد كُريم وعمر مكرم وحجاج الخضرى ومصطفى البشتيلي.

اتمنى ان بتوع الدراما يكونوا فهموا ان الناس مبقيتش طايقة مسلسلات الحب والجواز والطلاق وقصص انتقام النسوان وحكاوى التنمية البشرية بتاعة عبد الغفور البرعى والهرى بتاع عادل امام ونادية الجندى.

ايا كان المسلسل هيقول ايه.. اكيد هيعمل جدل والناس هتفتح الكتب وتقرأ.. ومع القراءة هيبان كتير اوى من بلاوى مصر المدفونة تحت اسوار القلعة.

يا مسهل يارب.