مين فينا ما بيحصلش معاه كده.. يصحى الصبح ويبقى عارف اللي وراه النهاردة، بس على آخر اليوم يلاقي إنه أنجز 30 أو 40% بس؟
والمبرر دايما إنه “مافيش وقت”، لا فيه وقت على فكرة، بس المشكلة الأساسية عندنا، عشان ما بنعرفش إزاي ننجز اللي ورانا بسرعة ونوفر مزيد من الوقت عشان ننجز حاجات أكتر.
هنا هنقول مجموعة نصايح مختصرة وسريعة هنسميها ” نصايح سحرية لإدارة الوقت”، هتخليك تنجز كل مهمة أسرع من العادي، وبالتالي هتلاقي فائض وقت تقدر تخلص فيه كل اللي كنت دايما بتأجله عشان ماعندكش وقت، اتبع النصايح ديه وهتعرف إزاي تدير وقتك صح:
– ممكن دايما يكون عندنا وقت، احنا بس محتاجين ندي النقطة ديه أولوية في حياتنا، لأنه من أكبر الأخطاء اللي بنرتكبها إننا بنقضي أكبر وقت من يومنا في الشغل، لكن عشان نشتغل بضمير وتركيز لازم نقسم وقتنا كده: نخصص وقت كويس للنوم، وقت كبييير للترفيه، وبعض الوقت للشغل.
– الوقت الطبيعي اللي هتطلع فيه إنتاج كويس في الشغل هو 4-5 ساعات شغل حقيقي كل يوم.
– طبيعي جدا إن تعدي عليك أيام مش قادر تشتغل، وأيام تانية يبقى عند استعداد تشتغل 12 ساعة متواصلة، اشتغل كويس قوي لما تكون في مود الشغل، وماتجيش على نفسك لما تكون مش قادر تشتغل…الغربية بقى إن معدل إنجازك هيبقى أعلى بكتير.
– وقتك غالي، اتعامل على هذا الأساس، قدر قيمة وقتك وخلي كل اللي حواليك كمان يقدروه.
– اعمل لنفسك روتين محدد جوه الشغل، وامشي عليه، إنجازك هيبقى أسرع بكتير.
– حدد لنفسك دايما موعد نهائي لكل مهمة، لأن الأداء دايما يكون أفضل وأسرع طالما بتشتغل في إطار مدة زمنية محددة.
– افصل بين التنفيذ والتفكير، عشان تقدر تنفذ أسرع وتفكر بشكل أفضل، وبالتالي تكون أكثر انتاجية.
– اشتغل في سياق واحد طول اليوم، التنقل المستمر بين التكليفات والعملاء المختلفين هيخلي إنتاجيتك أقل.
– إبدأ بالشغل البسيط الأول، وبعدين عجلة الشغل هتدور وهتخلص كل اللي وراك تباعا.
– قسم المهمة أو الهدف الكبيرة لعدد من المهام اليومية الصغيرة، وبكده شغلك اليومي هيقربك من هدفك وكمان إنجازك هيبقى أسرع.
– خليك دقيق جدا في كتابة قائمة “المهام” الخاصة بيك، رتب أولوياتك كويس، لأنه مفيش أبدا مهمتين ليهم نفس الأولوية.
– استخدم مبدأ التفويض، اتعلم تنتفع وتستفيد بوجود الناس اللي حواليك، لو عندك حد يقدر يخلص مهمة من اللي عليك حتى ولو بنسبة 80%، كلفه بيها.
– ما تضيعش وقتك أبدا في التفكير في الماضي، استثمر كل وقت متاح في التفكير في الحاضر والمستقبل.
– استعين بالورقة والقلم أو بكتابة ملاحظات على موبايلك، لكن لا تعتمد على ذاكرتك أبدا.
– خد فترت استراحة كل شوية، عشان ترجع تكمل شغلك وانت نشيط ومركز.
وفي النهاية لازم نفهم كويس إننا لو عايزين نلاقي وقت ننجز فيه كل اللي ورانا هنقدر نلاقي، القصة بس شوية تخطيط وحسن إدارة للوقت.
