فيه مقولة للملاكم الأمريكي “مايك تايسون” بتقول “كل منا لديه خطة، حتى يتلقى لكمة على وجهه” وأعتقد ان ده ينطبق برضه على البيزنس وتأسيس شركة جديدة، ممكن قوي تكون مختار فكرة مبتكرة، وتوقيت مناسب، وفريق عمل كويس جداً، ونظرياً كله ماشي تمام، وتيجي “اللكمة” المنتظرة من ناحية “التمويل” وتكون النقطة ديه هي سبب فشل الشركة.
واحد من أبرز وأهم أسباب انهيار الشركات الجديدة هو فشل رواد الأعمال في جمع النوع المناسب من التمويل في الوقت المناسب، زي إنهم يبدأوا بدفع فلوس كتيرة من جيبهم الخاص، أو الاعتماد على كم كبير من فلوس الأصحاب والعيلة، وده بيخلي صاحب العمل نفسه يتشتت كل ما صديق أو فرد من العيلة يسأل عن الشركة، وعن فلوسه الي استثمرها فيها.
كمان الفشل بيجي من عدم إدراك رواد الأعمال الجدد لكيفية تقييم شركتهم، وعدم قدرتهم على تحديد قدر التمويل المطلوب لتأسيس الشركة دون مبالغة رقم التمويل أو تقليله عن الحد المطلوب.
طيب نحل المشكلة ديه إزاي؟
بيقولنا الكاتب “نورم برودسكي” في كتابه ” street smarts an all-purpose tool kit for entrepreneurs” إن كتير من رواد الأعمال عندهم أفكار مشروعات رائعة، ورغم ده مش بيعرفوا يلاقوا ممول لشركاتهم الناشئة، وده بسبب انهم محتاجين فهم أكثر دقة لتعريف ووظيفة “المستثمر أو الممول”.
وبيحذر بروسكي رواد الأعمال من 3 مشاكل لازم يبعدوا عنها عشان يلاقوا المستثمر المناسب :
1- ما ينفعش تعرض خطة عمل على المستثمر لا تتضمن نسبة أرباحه المتوقعة، لأنه أكيد مش هيحط فلوسه في شركة مش عارف هيربح منها كام.
2- أي رائد أعمال بيحط خطة إنفاق للتمويل المطلوب لازم يبعد عن التبذير أو الصرف على رفاهيات مالهاش لزوم لأن ده هيخوف أي ممول من إنه يحط فلوسه في إيد شخص مبذر وغير مسئول.
3- كتير من المبتدئين في عالم الأعمال بيطلبوا من أي ممول يدفع ديون أو التزامات مشروعهم الي بدأوا فيه من فترة قبل ما يلجأوا لطلب التمويل!! وده سبب كافي جداً إن أي ممول يهرب منك.
كمان مهم جداً انك تختار المستثمر اللي هيهتم بفكرتك وبمشروعك، فلو هتعمل مثلاً مشروع ليه علاقة بأجهزة الكمبيوتر، ماتروحش تدور على تمويل عند مجموعة دكاترة !!
وأخيراً لازم أي رائد الأعمال يكون ضامن تمويل شركته الناشئة لفترة لا تقل عن 3 سنين، من غير ما يعتمد على الأرباح المتوقعة، لأن الأرباح ممكن جداً تتأخر، وبالتالي لو اعتمدت عليها في تمويل الشركات الناشئة، هتكون السبب في فشل المشروع. وربنا يوفق الجميع لنجاح مشروعاتهم 
