وبعد نهاية حظر ال 3 أيام بتوع مارك.. رجعنا تانى ومعانا فيلم الملاك.
الكلام ده مش خوض في حياة اشرف مروان ولا ظروف موته الغامضة.. كون مبارك شكر فيه يبقى راجل وسخ قولا واحدا.. الكلام هنا عن الأخطاء التاريخية في الفيلم الإسرائيلي الأمريكي.
اللى قرا كتاب “الملاك: الجاسوس المصري الذي أنقذ إسرائيل” بتاع يورى بار جوزيف يبقى تقريبا شاف الفيلم.. الكتاب صدر عن مكتبة تنمية واتسبب في 5 سنين حبس لخالد لطفي صاحب المكتبة بتهمة افشاء اسرار عسكرية.. الراجل أعاد نشر الكتاب بس.. لا الف ولا ترجم ولا نقص ولا زود.. بس الرسالة واضحة.. اى تعاطف مع الرواية الإسرائيلية لقصة الطفل المعجزة.. هتتشد علطول.
الفيلم بيحكي عن دور اشرف مروان فى الفترة من 1969 الى حرب أكتوبر كعميل مزدوج لعب على الحبلين بهدف تحقيق سلام دائم بين مصر وإسرائيل.. كلام اليهود ملوش اى مصدر الا صحافتهم..
قد يهمك: ملخص مسلسل Breaking Bad
التحقيق اللى حصل مثلا مع الجنرال إيلى زعيرا مدير الموساد وقتها مفيهوش اى إشارة الى اسم اشرف مروان.. حكاية انه كان عميل اسمه الحركي “بابل” دى مصدرها بديعوت احرونوت.. اليهود عندهم قانون كشف المعلومات بعد 50 سنة من الحدث مش زينا كده سرهم في بير..
يعنى 2023 هنعرف ان كان عندهم دليل قاطع على كون اشرف مروان هو العميل بابل وللا دى هبده صحافة.. عندنا كمان شهادة الكاتب والمحلل السياسي الإسرائيلي اهارون بيرجمان المنشورة في مجلة تايم الامريكية بتاريخ 14 سبتمبر 2018.. الراجل ده قال ان أشرف ضلل إسرائيل كتير بمعلومات غلط.. وهو كان صديقه الشخصي.
- ايه بقى العك “التاريخي” اللى في الفيلم؟؟
أولا: عبد الناصر خمورجي
لم تثار الشكوك اطلاقا ان عبد الناصر شرب خمور.. قول في عبد الناصر زى ما تقول.. سب والعن فيه زى ما تحب وانا معاك وزياده.. بس في تهمتين محدش ذكرهم ابدا ولو على سبيل التشويه حتى.. السرقة والعربدة.. لم يختلف اثنان ابدا على براءة ذمة ناصر المالية واستقامة اخلاقه.. لا نسوان ولا كوباية ولا الهلس ده.. ومش علشان كان متدين.. شخصية الصعيدي اللى جواه رفضت الكلام ده..
في كتب مثلا زى البوابة السوداء أو مذكرات زينب الغزالي طلعوا ناصر العن من الشياطين “وهو يستحق الحقيقة” لكن ولا واحد فيهم ابدا تعرض الى ذمته المالية او سلوكه الشخصي.. السادات انتشرت حواليه اشاعات زى كده.. قالوا بيحشش وبيشرب فودكا وبتاع..
لكنها تظل حكايات من الهبد بتاع هيكل وانيس منصور.. حكالي فلان.. قالتلى علانه وهى بترقصلى.. سمعت عن ترتان واحنا بنحشش.. اللى هو كلام خايب مفيش عليه اى دليل.
يبقى منين في الفيلم مطلعين عبد الناصر والسادات بيشربوا هوب هوب وبيقولوا في صحتك يا مون بيه؟
ثانيا: مراكز القوي
القبض على سامى شرف وشعراوي جمعة وعلى صبري لم يكن ابدا لفساد مالي او قضايا مركونة.. الفيلم مطلع ان اشرف مروان دور في مكتب عبد الناصر يوم وفاته وطلع ورق قضايا ضد الثلاثي ..
مما يعنى ان ناصر كان عارف وساكت او ماسك عليهم ذلل.. وده مش صحيح اطلاقا.. الجماعة دول قبض عليهم السادات بعد استقالتهم في مايو 1971 بعد ليلة مراكز القوى والخناق على الحكم والكلام ده.
ثالثا: سامى شرف
الراجل ده انتهى فعليا بحبسة سنة 71.. محصلش منه اى قلق لحد ما خرج في مايو 1981.. الراجل انكمش على نفسه وقفل بقه تماما.. فين بقى لما السادات مات ومبارك بدأ يعجز بدأ يتكلم على خفيف كده في مجلة الشباب قبل ما ينشر مذكراته الكاملة في كتاب بعنوان سنوات وايام مع عبد الناصر.
يبقى ازاى طالع في الفيلم انه كان بيدبر للإيقاع بأشرف مروان وهو في السجن بمساعدة ظابط من المخابرات المصرية؟؟
رابعا: موعد الحرب
الفيلم جايب ان اشرف مروان هو صاحب توقيت الهجوم في أكتوبر 73.. اللى هو يعنى طظ في هيئة العمليات والمشير الجمسي واللواء صلاح نحلة وال 7 ظباط بتوع مركز الدراسات الاستراتيجية وكل اللى عملوه علشان يحددوا للسادات مسافة زمنية مناسبة يختار منها موعد الحرب.. طبعا الفيلم بيهري..
توقيت الحرب بالظبط كان من اختيار السادات بناء على المعلومات والبدائل المقترحة من هيئة العمليات والمشير الجمسي.. النحيف المخيف رحمة الله عليه.
خامسا: ابلاغ اليهود بموعد الهجوم.
الفيلم حكي ان اشرف مروان بلغ اليهود اننا هنضريهم يوم 6 أكتوبر الساعة 6 مساء.. واليهود كانوا مترددين يصدقوه وللا لأ لأنه بلغهم بموعدين فالصو قبل كده.. وقرارهم النهائي حسب ما جه في الفيلم هو انه بيفتى.. المصريين لا هيضربوا ولا نيله.
طيب ايه الدليل ان ده هرى فاضي؟؟
سببين..
اولهم
ان السادات بنفسه اعلن التعبئة العامة على مرآى ومسمع من اليهود مرتين قبل اكتوبر كجزء من خطة الخداع كلها.. يعنى مكانوش محتاجين حد يقولهم هنضرب وللا لأ.. الراجل بنفسه بيقولهم انا هضرب.. بص العصفورة.. عليكوا واحد.
ثانيهم
ان الملك حسين بنفسه اعترف بلسانه انه ركب طيارته يوم 5 أكتوبر وقابل جولدا مائير وبلغها بموعد الحرب.. وحسب شهادة الجنرال ايلى زعيرا مدير المخابرات – اللى كان سامع الحوار ده – هي مخدتش الامر بجديه.. الكلام ده موجود في فيلم وثائقي من انتاج MBC اسمه 50 عاما من الصراع العربي الإسرائيلي.
سادسا: ملاكي زمالك.
عربية اشرف مروان.. ملاكي الزمالك ولها 6 نمر.. اللى هو ايه بقى.. ايه.. 6 نمر ازاى في الوقت ده.. وملاكي زمالك ايه بس.. ايه الهبد ده!!
بس ممكن نعديها طالما مش ملاكي أهلي.
سابعا: العلم المصري..
العلم المصري كان بنفس الوانه الحالية ولكن بدل النسر كانوا نجمتين خضر فى الفترة من 58 الى 71.. وبعدين من 71 الى 84 اتشالوا النجمتين ونزل بدلهم صقر قريش.. ومن سنة 84 لحد النهارده اتشال صقر قريش وموجود مكانه نسر صلاح الدين.. وبكره السيسي يشيل النسر ويحط مكانه المواطن المطحون بتاع فلاش.. شعار المرحلة.
أوقات في الفيلم كان بيظهر السادات ووراه العلم بصقر قريش وساعات بالنجمتين الخضر..
ثامنا: المزه ديانا اليس
الفيلم جايب علاقة زى اللوز بين الطفل المعجزة ومزة انجليزي معتبرة من اللى هما يعنى يمشوا على العشب فلا ينثنى منه عودا واحدا.. بس صاحبنا طلع مقطف واستخدمها علشان يضلل اليهود مش الاستخدام الصحيح.
الكلام ده هبد.. اهارون بيرجمان في نفس شهادته لمجلة تايم قال ان مفيش دليل على وجود اى مزز في الليلة دى.. انا مصدقه الحقيقة.. اشرف مروان كان راجل وسخ اه.. بس مش اشرف أبو حجر.
تاسعا: القذافي نجم الجيل
القذافي طالع في الفيلم ده بدور أبو لهب.. ده مش قصر رئاسي اطلاقا.. ده كازينو الليل بتاع شريفة فاضل الليبية.. خمره ونسوان ورقص وحفلات وليله كبيرة اوى.. حتى لما اشرف مروان حب يمشى القذافي عرض عليه يجرب بنات ليبيا بس اشرف اعتذر وقاله لا مؤاخذه اصلى متجوز ومنى ايديها ثقيلة حبتين.
رئيس دولة ده وللا قواد!!!!
المنظر ده شفناه مرتين قبل كده.. مره في فيلم هجرة الرسول لما أبو جهل وأبو لهب كانوا بيحتفلوا بعام الحزن وأبو لهب بيتحرش بماجده وبيقول لعدلى كاسب كل مصائبهم عندنا افراح يا أبا الحكم.. والمرة التانية في فيلم مسجل خطر بتاع عادل امام وسعيد عبد الغنى اللى كان طالع في دور بدر بيه اللى عايش وسط كمية مزز مهولة بيعمل بيها احلى واجب مع صحابه.. انما في الحقيقة.. وان ده قصر رئاسي.. لا دى بلح خالص.
عاشرا: اللغة
اللغة العربية في الفيلم شنيعة.. مش عارف ايه السبب في عرض مقاطع ناطقة بالعربي أبو لكنة إسرائيلي ده.. اذا كان الممثلين مش متمكنين من العامية المصرية.. يبقى ايه لزومه.. متخيل انت انك سامع الرئيس السادات بيتكلم عربي بلكنة إسرائيلي!!!
ده ولا أفلام نادية الجندي يا جدعان.
أخطاء فرعية..
– العساكر اللى قبضت على مراكز القوى كانوا لابسين بيرية كاكي.. المفروض يكون الأحمر بتاع الشرطة العسكرية.
– ظهر مبنى قبل حرب أكتوبر مكتوب عليه وزارة الدفاع.. الوزارة كان اسمها وزارة الحربية لحد سنة 80.. بعد كده بقى اسمها وزارة الدفاع.. ده واحد من بنود اتفاقية السلام.
– الطرابيش بتعمل ايه في الفيلم ده؟؟
على الهامش..
الفيلم ده كله مفيهوش الا الجدع اللى عمل دور السادات.. ده ممثل اسمه ساسون جاباى.. هو اللى عمل دور الرئيس العراقي احمد حسن البكر في المسلسل الإسرائيلي بيت صدام اللى اشترك فيه عمرو واكد سنة 2008.
