في زمن الكورونا || وعي الشعوب لازم يسبق وعي الحكومات في الساعات والأيام الصعبه القادمه ..
خصوصًا لما نبقي متأكدين ان الحكومات قدراتها البشرية والمادية بعيد جدا عن مواجهه انتشار وبائي مؤكد .
اولا :
توقف فورا عن ارسال عيالك للمدارس حتي لو حكومتك لسه مقررتش لان اغلب دول العالم عطلت فيها المدارس خلاص
ثانيا :
توقف عن الذهاب الي عملك فورا ان كنت تستطيع العمل من المنزل وان لم تستطع فلا تفرط في إجراءات الوقايه قبل و اثناء عملك
ثالثا :
توقف فورا عن اَي زيارات يمكن الاستغناء عنها لاماكن تجمعات بشرية
رابعًا :
غسيل يدك وجميع افراد المنزل يوميا ليس رفاهيه و يجب التركيز في عدم ملامسه اَي اسطح غريبه بره حدود البيت او مصافحة اَي غريب و تنظيف البيت و تهويته و التعرض للشمس . ..النظافه بشكل متكرر سبيلك للوقايه و النجاه .
خامسا :
متخزنش اكل يكفيك شهور من اَي سلع رفاهية ومتزودش ازمة غذاء متوقعة لكن خزن مواد أساسيه تكفي اسرتك اسبوعين وانزل بشكل اسبوعي متكرر لوحدك و بحرص اشتري اد كمية الاستهلاك الاسبوعي ( دقيق – رز – مكرونه – بطاطس – صلصه- لبن طويل الأجل – بصل – توم )
سادسا :
متستسلمش لزهق العيال من الاعده في البيت فتسيبهم يلعبوا مع ابن او عيال الجيران ..الطفل ممكن يبقي حامل الفيروس ولا يصاب بأعراضه ويرجعلك بيه
سابعا :
تليفونك يتنضف اول تصحي و اثناء اليوم و قبل النوم ب مناديل كحولية مبلله لانه اكتر سطح خارجي بتلمسه و ميخرجش من جيبك و ميتسابش علي ترابيزات او كراسي بره البيت .
ثامنا :
توقف عن الهرش في عينك و مناخيرك و بقك وعود نفسك ان إيدك متترفعش علي وشك
تاسعا :
لو حسّيت بالأعراض مفيش داعي للهلع او الاختباء او الإحساس بالوصم ده فيروس بيصيب كل الناس بما فيهم رؤساء حكومات و لو توفرت الخدمه الطبيه في محيطك توجه للحصول عليها وان لم تتوفر يبقي تعمل لنفسك عزل انتقائي في غرفه داخل بيتك يفضّل تكون بحمام خاص بيك وفي حال ظهور الأعراض علي اَي من افراد الاسره ينتقل معك للاقامه في غرفة العزل وبنسبه فوق ال ٩٥٪ جسمك ومناعتك هاتهزم الفيروس خلال ١٤ يوم خصوصا لو معندكش أمراض مزمنة .
عاشرا :
الاكل الصحي والتعرض للشمس والحفاظ علي كميه المياه كافيه في الجسم سبيلنا لتدعيم نظام للمناعة الذاتي للتغلب علي المرض حال تعذر الحصول علي رعايه طبية ..اذا كانت الأعراض شديده وحادة يجب محاوله الوصول الي اقرب مركز طبي او الذي يليه في الإتاحة ..
اذ لا قدر الله حصلت وفاه فالجزع مش هايصحي ميت ولا هايحمي عايش ..الموت حق والمرض ابتلاء و امر الله نافذ وليس لنا الا الأخذ بأسباب النجاة والدعاء في أوقات المحن وقد تأكد لكل عاقل اننا في قلب المحنة وليتحمل كل انسان مسئوليته تجاه نفسه و أسرته و مجتمعة …
ممكن تساهم في إنقاذ العالم و البشرية بحرصك وجديتك علي إنقاذ نفسك و اهلك المسئولين منك .
وأخيرًا …صلي في بيتك اَي كان دينك لان دفع الضرر مقدم علي جلب المنفعة .
ولندعوا الله ان يعفوا عنا و يرحمنا و يرزقنا اسباب النجاة والصبر اثناء المحن
