بعد ما منظمة الصحة العالمية أعلنت من يومين إن Corona virus ) covid-19 ) أصبح وباء عالمي ، و بعد ما العالم كله رفع أقصى درجات الاستعداد للخطر ، ف دي أهم المعلومات اللي لازم تكون عارفها عن فيروس كورونا عشان تقدر تحمي نفسك و الناس اللي بتحبهم :
– ايه هيا طرق انتقال المرض ؟
المرض بينتقل من المريض من خلال ( الكحة – العطاس – الرذاذ المتطاير من فمه ) ، أو من خلال إنك تسلم على المريض أو تستعمل أي أداة من أدواته .
– هل لو أنا كنت مع شخص مريض و اتنقلي الفيروس هل كده هكون مريض ؟
لا ، مش معنى إنك تصاب بالفيروس إنك هتكون مريض أو حالنك خطيرة ، لأن في 3 أنواع من المصابين :
- النوع الأول :
شخص اتنقله الفيروس ، لكن مفيش أعراض ظهرت عليه ، لأن المناعة بتاعته كويسة فتغلبت ع الفيروس و انتهى .
- النوع التاني :
شخص اتنقله الفيروس ، وظهرت عليه الأعراض ، لكنها بسيطة ، و مع الوقت بيتعالج و بيخف منها .
النوعين دول بيجوا في 90% من الحالات و بيشفوا تماما بإذن الله ، لكن المشكلة إن لاقدر الله لو انت مصاب و انت متعرفش إنك مصاب فبتنقل الفيروس بتعاملك مع الناس ، لذلك لما نقول إجراءات الوقاية و الحماية فانت بتحمي نفسك و بتحمي الآخرين .
- النوع التالت :
شخص عنده الفيروس و عنده أعراض المرض بشكل حاد ، و ده وضعهم بيكون خطير و لاقدر الله قد تنتهي بالوفاة . و ده بيمثل 10% فقط من الإصابات و الوفيات بتحصل في الناس الكبار فوق السبعين سنة أو اللي عندهم أمراض مزمنة و مناعتهم ضعيفة ، لذلك انتبه .
– إيه هيا أعراض المرض ؟
اعراض مشابهة إلى حد كبير لأعراض الانفلونزا ، أهم ما يميزها كحة ناشفة ، سخونية ، همدان ف الجسم .
– أعمل ايه عشان أحمي نفسي من الإصابة بالفيروس ؟
1- لما تكون واقف أو قاعد مع حد خليك على مسافة متر بينك و بينه ع الأقل .
2- تجنب انك تسلم على حد بالإيد و أكيد البوس و الأحضان – الفيروس بيفضل على اليد لمدة 15 دقيقة – فلو سلمت على حد عنده الفيروس و كان لسه عاطس أو كاحح في إيده مثلا فانت بالسلامة كده .
3- لو خرجت بره ، ركبت مواصلات ، ارجع حط الهدوم ف الغسيل و تتنشر ف الشمس ، لأن الفيروس بيفضل على الأقشمة لمدة 9 ساعات ، فلو لاقدر احتكيت بشخص مصاب بأي شكل أو من زحمة مثلا و الفيروس اتنقل لهدومك ممكن يصيبك أو يصيب حد من الناس اللي قاعدين معاك .
– لما أكون خارج البيت تنصحني بإيه عشان أحمي نفسي ؟
تجنب بقدر الإمكان ملامسة الأسطح الزجاجية و المعادن ( لو انت في المترو مثلا ماسك الماسورة اللي فيه أو كذلك في باص ، أو حتى راكب اسانسير -مصعد- بتفتح الباب بتاعه أو بتدوس على الزراير – أو بتستخدم العملات المعدنية ) الفيروس ممكن يتنقلك ، لأنه بيبقى على الأسطح الزجاجية و المعادن و البلاستيك لمدة قد تصل ل 9 أيام . – وفقا لمعهد جاليلي للأبحاث – .
– هل أقلق إن الفيروس يتنقلي من كتاب مثلا أو طرد بريد أو ورق ؟
يعني مش أوي ، الفيروس مبيفضلش على الورق لفترة طويلة ، لكن بالرغم من كده الحكومة الصينية بدأت تغير العملات من السوق و تنضفها كإجراء احترازي .
– هل لازم ألبس كمامة – mask – ؟
الأهم منها مليون مرة إنك تغسل إيدك باستمرار بصابون مطهر ، من وقت للتاني .
الكمامة ملهاش تأثير زي ما انتوا متخيلين ، لأن الفيروس لا ينتقل ف الجو لمسافات ، بتكون مهمة إذا انت على مقربة من مريض ( لو انت دكتور في مستشفى ، أو لو انت في مكان مزدحم ) .
– غسل اليدين مهم لمدة لا تقل عن 20 ثانية في المرة الواحدة ، نضف الأسطح ( المكتب بتاعك ، المكتبة ، المطبخ ) نضف الحاجات الشخصية اللي بتستخدمها ( الموبايل مثلا ) .
الوعي الصحي مهم جدا الفترة دي جدا ، لذلك انتتبه و متاخدش معلومات إلا من مصدر موثوق ، و اعمل شير للبوست عشان نساهم في توعية الناس بشكل إيجابي .
ربنا يمتعكم بالصحة و يبعد عنكم أي حاجة وحشة .
- – د.صلاح قطب –
