مفيش حد بيشتغل في شركة أو بنك أو جريدة أو قناة تلفزيونية أو أي مكان تاني ما سمعش عن مسئول الموارد البشرية “HR”، ورغم كده كتير جدا لما تسألهم مين HR ووظيفته إيه في المكان، ما يعرفش يجاوب.
المعضلة هنا إنه أي حد عايز يشتغل HR أمامه فرص كتير على قد ما فيه شركات ومؤسسات في البلد، بس في الوقت نفسه بيواجه تحدي إنه يلاقي فرصة مميزة عشان فيه ناس كتير بيبقى معاها ورق وشهادات “أي كلام”- مضروبة يعني- تقول إنهم بيفهموا في الشغل ده.
إحنا هنا هنشرحلك مين الـHR ووظيفته إيه، وكمان هتعرف إزاي تقدر تعلى في شغلك وتترقى في المجال ده لو قررت إنه هيبقى الكارير بتاعك.
خلينا في الأول نعرف الرجل بتاع HR بيعمل إيه في الشركة إلي بيشتغل فيها؟
أي موظف في إدارة الموارد البشرية بتبقى وظيفته:
- 1- التخطيط للوظائف المطلوبة سنويا وتكلفتها.
- 2- الاختيار والتعيين للموظفين المناسبين.
- 3- المقابلات الشخصية.
- 4- المرتبات.
- 5- التدريب.
- 6- تقييم الأداء.
- 7- تحديد الوصف الوظيفي لكل وظيفة في المؤسسة.
- 8- المزايا والتعويضات.
ليه بقى وظيفة HR مهمة في أي شركة؟
باختصار إدارة الموارد البشرية هي إدارة استراتيجية بتحقق أهداف ورؤية المنظمة، الـHR هو حلقة الوصل بين الموظفين والمنظمة .. يعنى موظف الـHR هو اللي بيضمن حصول الموظفين على حقوقهم من الشركة وفى نفس الوقت تنفيذ أهداف الشركة من قبل الموظفين.
طيب ..أي حد طموح بيبقى عايز يعرف فرص الترقي في المجال اللي بيشتغل فيه، يعني لما أبقى HR في شركة وأترقي هبقى إيه؟ هوصل لحد فين؟
لما هتبدأ الشغل أول ما تتخرج هتكون HR Coordinator / HR Assistant
وده شخص بيشارك فى التخطيط وإعداد البرامج التنفيذية لإدارة الموارد البشرية وينفذها، وبيسجل جميع قرارات التعيين والفصل والاستقالات والإجازات، وبيعمل كشوف الترقيات والمرتبات، ومسئول كمان عن حفظ ملفات العاملين وبيكتب تقارير التقييم السنوية، ومسئول عن متابعة الحضور والانصراف والغياب للموظفين.
*وبعد كده HR Specialist
وده بيكون متخصص في وظيفة أو أكتر زي التدريب أو التوظيف أو التقييم وممكن الـHR Specialist يتسمى باسم التخصص أو المهمة إلي بيعملها زى :
- الـ Recruiter وده بيكون مسئول عن الاختيار والتعيين
- الـ Training & Development وده بيكون مسئول عن التدريب وتطوير مهارات العاملين
- الـ Compensation and Benefits Specialist وده مسئول عن المزايا والتعويضات
*وبعدين Senior HR Specialist
وده بيبقى بنفس اختصاصات الـ HR Specialist بس بيكون معاه صلاحيات أكتر لأنه بيكون المدير المباشر ليهم.
* وبعد كده هتكون HR Supervisor
وده مشرف موارد بشرية وهو إلي بيشرف على الـ Orientation و الـ applicant interviews و الـ Retirement Workshop والتواصل مع الإدارات التانية بغرض تقديم المعلومات والمساعدة وبينسق عملية التوظيف، وهو كمان الليي بيقيم البرامج التدريبية.
* وبعد كده هتبقى HR Assistant Manager وده بقى مساعد مدير الـHR
* بعدها هتكون HR Manager
وده مسئول عن عمل الوصف الوظيفي لكل الوظائف وبيتابع تقييم الأداء وبيعمل ميزانية الأجور وبيختار المقبولين في الوظائف وبيتابع التطورات في سوق العمل وبيشرف على برامج التدريب للموظفين وهو المسئول عن كل الوظائف بقى بتاعت HR.
* الترقية اللى بعدها هتبقى Senior HR Manager وده كبير مديرين الـHR
* والخطوة اللي بعدها HR Director وده مدير ادارة الموارد البشرية
وبيشرف على كل العاملين في وبيقدم التوصيات لباقى الإدارات وبيقييم وبيشارك في تنمية مهارات الموظفين.
وأعلى درجات السلم الوظيفي هنا هتكون Vice President وده نائب رئيس الشركة .. هو اللي بيحضر اجتماعات مجلس الادارة وبيشرف على كل اللي إحنا اتكلمنا عليهم دلوقتى عشان يضمن تطبيق سياسات الشركة وهو كمان بيشرف على وضع الميزانية.
الـHR بحر كبير وواسع، ومش أي حد قرا شوية عنه يقدر يشتغله صح، لو عايز تتعلم HR بجد وتنجح في المجال ده تقدر تشترك معانا في دبلومة “الموارد البشرية” اللي بنتناول فيها كورسات مختلفة زي: الموارد البشرية، المزايا والتعويضات، تطوير رأس المال البشري، ومهارات القيادة، وقانون العمل المصري، مهارات التفاوض، وتخطيط وإدارة الموارد البشرية، وطبعا أساسيات المقابلات والتوظيف وإزاي تقدر تعمل تحليل للوظيفة وتوصيف دقيق ليها، وكمان مجال التدريب والتطوير، و تحفيز الموظفين.
