واحد من أشنع الفيروسات اللي ممكن تكون موجودة علي فلاشة حضرتك أو الكمبيوتر دلوقتي ومش عارف عنه حاجة هوا فيروس الـAutorun 
فيروس من كتر ما هوا رخم يخليك تتمني يجيلك دور بَرد ولا إن الفيروس دا ييجي لفلاشتك أو يقرَب من الكمبيوتر 
😂
الفيروس اللذيذ دا بمجرد ما يتنقل لك من كمبيوتر صاحبك -مثلاً- بيمرح بين ملفاتك بكل حرية من غير ما أي حد يعترض طريقُه.
إيه الأوتورَن دا؟ بيشتغل إزاي؟ وإزاي تخلص منه؟
كل الأسئلة دي هتعرف إجاباتها بعد ما تضغط علي (متابعة القراءة) اللي جاية دي، وتنزل علي الفقرة الجاية دي 
👇 😃
إيه هوا الـAutorun؟
الأوتورَن دا يا سيدي -وبأختصار شديد- نوع من الفيروسات الرخمة؛ ودا لأنه بيكتب/ بينسخ نفسُه علي أي فلاشة بيتواجد عليها، ولمّا الفلاشة المتصابة دي تتوصل بالكمبيوتر ويتم فتح أي ملف جواها بينقل نفسه برضو للكمبيوتر دا ويقعد ينسخ في نفسه وينتشر في كل بارتيشن ويبني مملكة ليه ويعيّن نفسُه مَلك للمملكة دي 😂
والنوع دا من الفيروسات خطير زَيُه زَي أي فيروس بيحترم نفسه (لو كان فيه فيروسات بتحترم نفسها وفيروسات مبتحترمش نفسها 😂) ؛ لأن البرنس دا ممكن يعمل أي حاجة في جهازك بدايةً من أنه يتجسس عليك، وأنتهاءً بأنُه يدمَر ملفاتك. والفيروس دا يعتبر من أقوي الفيروسات اللي ممكن تنتقل عن طريق الفلاشة أو كارت الميموري.
إزاي الفيروس دا بيشتغل؟
الفيروس الجميل دا بيكون موجود في ملف بأسم (autorun.inf)، والفيروس دا بيستسخدم ميزة موجودة أساساً في جهازك أسمها الـAutoPlay، ودي المسئولة عن أنها بتظهر لك نافذة هتلاقي صورتها في التعليقات– لما توصل أي فلاشة علي جهازك وتخليك تختار تفتح إيه في الفلاشة؟ الملفات؟ ولا الصوتيات؟ ولا الصور الموجودة علي الفلاشة دي؟
لو كان فيه فيروس Autorun موجود جوا فلاشة فـ كُل ما هتتوصل الفلاشة دي بجهازك وتضغط كلكين عليها -كل ما تدوس Double Click يعني 😃– الفيروس الجميل دا هينتشر عندك ويبدأ يعمل نُسَخ كتير من الملفات ويقرفك خالص.
طب إيه أضرار الأَخ دا؟
الفيروس الجميل دا ممكن بكل بساطة وهوا موجود علي جهازك ممكن يتصل بموقع سري ويثبت حاجة أسمها الـkey logger، والـkey logger دا يا سيدي عبارة عن برنامج لطيف خفيف بيشتغل بسرية تامة، البرنامج دا بيسجل كل حرف بتدوسه علي الكيبورد في ملف ويبعته تاني للموقع.. يعني إيه؟
يعني الـkey logger دا ممكن بكلللللل سهولة يسرق كل وأي حساب ليك بتسجل دخول ليه عن طريق جهازك، يسرق بيانات أي كريديت كارد، أي حرف بتكتبه علي الكبيورد الـkey logger دا بيسجلُه ويبعته للبرنس اللي قاعد مستنيه
إزاي بقي تشيل الـAutorun دا وتخلص منه؟
إزالة الفيروس دا ليه طريقتين:
طريقة الـCommand Prompt :
من قائمة Start أفتح -أو أبحث عن- CMD، ودوس عليها كليك يمين وأختار Run as administrator علشان تضمن إن الكود اللي هتكتبه هيتطبق، وهتظهر لك رسالة دوس علي Yes.
بعد كدا نافذة الـCMD السوداء هتتفتح لك، لو الفلاشة بتاعتك واخدة حرف زي الـ(H)، هتكتبه، في حالتنا هنختار الـ(G)..
فـ تكتب الحَرف دا: “G:” في الـCMD وبعدين أضغط إنتر Enter.
بعدين أكتب الكود اللي بين علامتين التنصيص دا: “attrib -h -s -r -a *.*” وأضغط إنتر.
بعدين أنسخ الكود دا: “del autorun.inf” وألصقه هناك، وأضغط إنتر. وبكدا المفروض إن الفيروس هيكون أتحذف.
حذف الفيروس ببرنامج Autorun Removal Tool :
بعد ما تحمل البرنامج ( من هنا )، أفتح البرنامج وسطَبُه عن طريق إنك تدوس علي البرنامج تفتحه..
هتجيلك رسالة دوس لها Yes.
دوس علي Next
، وبعدين من الشاشة اللي هتيجي بعدها أختار i accept the agreement
وبعدين Next، بعدها دوس Next، بعدها كمان Next برضو
بعد كل دول دوس علي Install، وآخر حاجة هيا الـFinish.
البرنامج هيفتح، هتلاقي زرار أسمه Start… شاااطر.. دوس عليه!
كدا البرنامج هيعمل فحص لكل الجهاز وأي حاجة متوصلة بيه زي الفلاشات وغيره.
لو ظهرت لك رسالة بتقول لك: Recovering data in usb driver سيبك منها خالص، ودوس Cancle وريح دماغك :”D
بعد كام دقيقة هتلاقي البرنامج خلّص اللي كان بيعمله وهيجيب لك نتيجة الفحص في البارتيشنات اللي عمل لها فحص، اللي تلاقي جنبه كلمة (no threat found) يبقي كدا البارتيشن دا نضيف وملقاش فيه حاجة.. وبس كدا يا سيدي
جدير بالذكر إن البرنامج دا الشركة بتاعته بتقول إن ليهم خبرة حوالة 6 سنين في مجال التعامل مع الفيروسات، دا بالإضافة لإن البرنامج مش بينضف لك الفيروسات اللي عندك وبس، لكنه بيحميك من أي هجوم ممكن يتعرض له جهازك من أي USB كانت؛ ودا لأنه فيه حماية تلقائية بتبقي شغالة علشان كدا، وإن أنتا بتتمكن من إنك تخلص الحوار كله في مدة لا تتعدي الـ3 دقائق.
متنساش تعمل لايك للمنشور، وتعمل مينشن لصاحبك في الشغل اللي بينقل لك الفيروسات 😂 أو صاحبك اللي بيقوم بالواجب وبينقل الفيروسات للدفعة كلها 😂😂
المزيد عن فايرس الاوتورن في موسوعة المعلومات ويكيبيديا
-
حذف فيروس الاوتورن بطريقتين بدون برامج
