يمكن في الأغلب قرار الشخص أنه يستقيل من شغله بيكون غير وارد، أغلب الناس بتقرر تكمل في شغل مش بتحبه أو مش مناسب لمؤهلاتها أو مش لاقية فيه التقدير المادى أو المعنوى المتوقع، أو مفيش إنجاز وتطور، أو السبب الأكثر انتشار وهو بيئة العمل السامة واضطرارهم لتحمل السلوكيات السيئة وسوء المعاملة وده بسبب الخوف من المستقبل، الهلع من النتايج اللى ممكن تحصل بسبب أنهم سابوا شغلهم وبالنسبة الأكبر للناس اللي عندها مسؤوليات.
أقرأ المزيد: كيف تنافس زميلك في العمل … بدون خسائر !
وعشان كده في حالة وصول الشخص لطريق مسدود في حياته المهنية وخلاص قررت تسيب شغلك فلازم تكون حريص على إنك تسيب شغلك بنجاح يعنى تخرج منه وأنت متجنب أكبر الخساير الممكنة وده يتطلب منك عدد من الخطوات من أهمها:
الامور الواجب مراعاتها عند تقديم الاستقالة
- لازم تدور على شغل بديل يعنى يفضل متسبش شغلك غير لما تكون على الأقل ضامن شغل تانى او متاكد من ان وضعك المالى كويس ويقدر يغطيك فترة اكتر من 6 شهور عقبال ماتلاقى فرص شغل تانية، وكمان تتاكد من ضمان وضعك الصحى او لو ملتزم بقروض او تأمينات.
- اثناء ما انت بتدور على شغل تانى حاول تدور في هدوء بدون ما تقول لاى حد نيتك في انك تمشى لانه ممكن يستغلوا ده ضدك ويتم اجبارك على ترك الشغل بما انك كده كده ناوى تمشى بحجة انك معندكش ولاء.
- لازم تسيب شغلك على اكمل وجه وتكون مسلم كل العهد وواخد اثبات يحميك، كمان ماسح سجل التصفح او اى كلمات مرور خاصة بحساباتك او ايميلاتك سايبها مفتوحة او محفوظة تلقائى على الجهاز.
- حاول تخلى علاقاتك كبيرة ومفتوحة دايما، وحتى الناس اللى في الشغل اللى هتسيبه اذا كانت معرفتهم مش هتفيدك فحاول تكون محايد على الأقل مش هيضروك.
- اتجنب إنك تسيب شغلك بدون تقديم استقالة لأنه ده وبرغم كل الضغوط هيقلل من شكلك وقيمتك المهنية وهتكون بتهدر حق نفسك في حالة التقديم لفرص شغل تانية فالاستقالة هتكون اثبات إنك انت اللي سبت الشغل مش تم رفدك.
- لازم تبلغ انك هتسيب الشغل قبلها باسبوعين على الأقل وتوقع انه المدير او الجهة تطلب منك تقعد وقت أطول ممكن شهر لحين وجود بديل او التصرف في مهامك، وفى حالة ده حصل متعارضهومش.
- اقرا كويس العقد اللى كان بينك وبين الجهة قبل ما تسيب الشغل لانه ممكن يكون فيه شرط جزاءى وده ممكن يخليك تاجل الفكرة شوية لحين ما تقدر تكون ماليا قادر توفى الشرط وكمان تضمن وضعك المالى بعد ترك الشغل.
- قدم الاستقالة للمدير بشكل مباشر، تجنب إنك تسيب الاستقالة على مكتبه أو مكتب حد من زمايلك، أو توسيط أي شخص في تقديمها، لازم تقدمها بنفسك وتكون محايد في مشاعرك حتى لو سبب تركك لشغلك الغضب والضيقة ، كمان لو كانت أسباب أنك تسيب شغلك ممكن تأثر عليك فيما بعد في فرص شغل تانية فلاوم متقولش الأسباب دى وقول أي أسباب تانية متكونش سبب في وقف حالك بعد كده ، زى أنك تقول مثلا جالك عرض شغل تانى أفضل أو مثلا مكان الشغل بعيد عن المواصلات، او جالك منحة دراسية ، المهم متقولش انك مش مرتاح بسبب المدير او فريق العمل او مضايق او بيئة العمل سامة ومتسبش اى انطباع يولد عداءات بينك وبينهم.
- لازم أول شخص يعرف خبر استقالتك هو مديرك مش زمايلك في الشغل وبعد ما تبلغ مديرك تبدء تبلغ زمايلك وبرده لازم تتجنب اظهار الأسباب الحقيقية لو كانت ضيقة او عدم تقبل ليهم او اى مشاعر سلبية ممكن يتم استغلالها ضدك بعدين
أقرأ المزيد: إزاي تتعامل مع مديرك البطيخه!
